Túlekterge attestat tapsyrýda qandaı talaptar saqtalýy kerek

NUR-SULTAN. QazAqparat – QR Bas memlekettik sanıtar dárigeri Aıjan Esmaǵambetova mektep túlekterine attestat tapsyrý rásiminiń qalaı ótetinin túsindirdi, dep habarlaıdy QazAqparat tilshisi.

«Qazir QR Bilim jáne ǵylym mınıstrligimen tyǵyz baılanystamyz. Sonymen birge, UBT men attestat tapsyrý rásimin ótkizý máselelerin qarastyryp jatyrmyz. Attestat tapsyrýdyń arnaıy algorıtmin ázirledik. Ol áli bekitilgen joq, jetildirý ústindemiz. Árıne, 11 jyl oqyǵan bala saltanatty túrde attestat alǵysy keledi. Bul ata-analar úshin de mańyzdy», - dedi spıker QR Densaýlyq saqtaý mınıstrliginiń Feısbýktegi baspasóz máslıhatynda.

Onyń aıtýynsha, bul másele uzaq ýaqyt boıy talqylanǵan.

«Bizdiń algorıtm boıynsha, bul shara mindetti túrde ashyq aýada ótýi tıis. Ara qashyqtyq saqtalýy úshin arnaıy syzyqtar salynýy tıis. Ata-analar men jaqyn týystardyń bul sharaǵa qatysqysy keletinin túsinemiz. Sondyqtan, olarǵa túbegeıli tyıym salmaı, rásimge keletin týystar sanyn qysqartýdy usyndyq. Eń bastysy – ara qashyqtyq saqtalyp, ózara qarym-qatynas az bolýy kerek», - dedi Aıjan Esmaǵambetova.