Túlekterdiń úshten biri UBT-dan «qulady»
ASTANA. 7 maýsym. QazAqparat - Túlekterdiń úshten biri UBT-nyń shekti deńgeıinen asa almady.
Bilim jáne ǵylym mınıstrligi búgin aldyn ala nátıjelerdi jarııa etti.
Qazirgi ýaqytta eń joǵary ballǵa tek 2 túlek qol jetkizgen. «Altyn belgi» medaliniń 5 myń úmitkeri ishinen tek jartysy óz bilimderin qorǵaı aldy. 100 balldan asyrǵandardyń sany 10 myń. Bul barlyq túlekterdiń 10 paıyzy ǵana.
«Árbir mekteptiń oqýshylary synaq bazasy boıynsha ortasha eseppen 7-8 ret aldyn ala testileýden ótti. Bizde ortasha jaǵdaı boıynsha shamamen túlekterdiń 28-32 paıyzy ulttyq biryńǵaı testileýdiń shekti deńgeıinen asa almaýy múmkin degen boljam bar. Bıyl UBT-nyń eń shekti deńgeıi 50 balldy quraıdy», - dep atap kórsetti Mahmetqalı Sarybekov «Eýrazııa» telearnasyna bergen suhbatynda.
Segiz kúnniń nátıjesi boıynsha, appelıatsııalyq komıssııaǵa 876 túlek aryz túsirgen. Onyń 40 paıyzyna balldar joǵarylatyldy.
Aıta keteıik, UBT 1-15 maýsym aralyǵynda arnaıy jabdyqtalǵan 154 pýnktte ótip jatyr. 107 pýnkt aýdan ortalyqtary men qalalardaǵy mektep ǵımarattarynda ornalasqan, al qalǵan 47-si oblys ortalyqtary men Astana jáne Almatydaǵy joǵary oqý oryndarynyń ǵımarattarynda jabdyqtaldy.
