Túlekterdiń qansha paıyzy jumysqa ornalasady
NUR-SULTAN. QazAqparat - Búginde tehnıkalyq jáne kásiptik bilim berý uıymdary túlekteriniń 68 paıyzy jumysqa ornalasady. Bul týraly týraly Parlament Májilisiniń jalpy otyrysynda depýtat Maıra Aısına málim etti, dep habarlaıdy QazAqparat tilshisi.
«Búginde qoǵamda mektep partasynan bastalatyn kásiptik baǵdar berý jumysyn jetildirý boıynsha aıqyn tujyrymdama bolmaı otyr. Sonyń saldarynan, Bilim jáne ǵylym mınıstrliginiń derekteri boıynsha, búginde tehnıkalyq jáne kásiptik bilim berý uıymdary túlekteriniń 68 paıyzy jáne joǵary oqý oryndary túlekteriniń 75,6 paıyzy ǵana jumysqa ornalasady. Alaıda, olardyń birazy óz mamandyǵy boıynsha jumys istep júrgen joq», - dedi M. Aısına QR Premer-Mınıstriniń orynbasary Gúlshara Ábdiqalyqovanyń atyna joldaǵan depýtattyq saýalynda.
Onyń sózine qaraǵanda, álemniń damyǵan elderinde is júzinde barlyq jerde kásiptik baǵdar berýdiń ártúrli qyzmetteriniń keń jelisi qurylǵan. Mysaly, AQSh-ta jyl saıyn kásiptik baǵdar berý men kásiptik irikteýdiń 1200 ortalyǵy arqyly 1 mıllıonnan astam amerıkalyq jasóspirim ótedi. Ulybrıtanııadaǵy, Japonııadaǵy kásiptik irikteýdi qoldanýdyń kóp jyldyq tájirıbesi onyń tıimdiligi joǵary ekenin kýálandyrady.
M. Aısınanyń paıymynsha, Úkimet elimizde kásiptik baǵdar berý jumysynyń turaqty júıesin keshiktirmeı qurý jóninde sharalar qabyldaýy qajet. Onyń ishinde: mektep partasynan bastap jastardyń ártúrli sanattarymen júrgiziletin Kásiptik baǵdar berý jumysynyń tujyrymdamasyn ázirleý; jastarǵa kásiptik baǵdar berý problemalaryn sheshýge arnalǵan kásiptik taldaý, saraptaý jáne konsýltatsııalyq servıs ortalyqtary jelisin qurýy qajet.
«Bizdiń oıymyzsha, árbir mamandyq úshin naqty ázirlengen, olardyń sıpattamalary men erekshelikteri kórsetilgen qazirgi de, jańa jáne bolashaqtaǵy da kásiptik standarttar Kásiptik baǵdar berý jumysy tujyrymdamasynyń quramdastary bolýǵa tıis. Jastar jylynda osyndaı tásildi qamtamasyz etýdiń mańyzy zor jáne ol elimizdegi adamı kapıtaldyń tıimdi damýyna, sonyń ishinde balalarymyzdyń bolashaqtaǵy kásibin tańdaýy men anyqtaýyna qajetti kómek kórsetýge jol ashýǵa tıis», - dedi depýtat.
