Túlekterdiń 66,29 paıyzy keshendi testileýden óte almady - BǴM
ASTANA. QazAqparat - Keshendi testileýge qatysqandardyń 66,29 paıyzy eń tómengi shek - 50 baldy eńsere almady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde keshendi testileý qorytyndylaryna baılanysty ótken brıfıng barysynda Bilim jáne ǵylym vıtse-mınıstri Tahır Balyqbaev málim etti.
Vıtse-mınıstrdiń sózine qaraǵanda, 19-22 shilde aralyǵynda respýblıkanyń 42 oqý orny bazasynda ótken keshendi testileý nátıjesi byltyrǵyǵa qaraǵanda birshama joǵary. Toqtala ketetin jaıt, keshendi testileý joǵary oqý oryndaryna túskisi keletin ótken jyldardaǵy mektep bitirýshilerge jáne kásiptik-tehnıkalyq bilim berý uıymdarynyń, kolledjderdiń túlekterine arnalady.
«Keshendi testileýge qatysýǵa 87 myń 60 ótinish berilgen, olardyń ishinde 84 myń 496 túlek test tapsyrdy. Sonyń nátıjesinde keshendi testileýdiń tómengi shegin (50 ball) 56 myń 17 talapker eńsere almaǵan, bul 66,29 paıyzdy quraıdy. Bunymen qosa, shyǵarmashylyq emtıhan tapsyrǵandardyń da bar ekenin eskersek, onda eń tómengi shekti eńsere almaǵandar sany 57 myń 759 adamdy quraıdy jáne bul 56,52 paıyzǵa teń», - dedi T. Balyqbaev.
Onyń aıtýynsha, shyǵarmashylyq emtıhan tapsyrǵandardy qosa eseptegende shamamen 44 paıyz túlek keshendi testileýdi tabysty eńsergen. Olar joǵary oqý oryndaryna túsýge úmitker bola alady.
