«Túlekter taqtasy» atty arnaıy joba iske qosylmaq
ASTANA. QazAqparat - Jastarǵa ulttyń maqsat-murattaryn durys jetkize alýymyz mańyzdy. Búgin elimizdiń barlyq óńirleriniń jastar saıasaty máseleleri jónindegi basqarma basshylarymen kezdesýi barysynda QR Din isteri jáne azamattyq qoǵam vıtse-mınıstri Abzal Núkenov osylaı málim etti. Eske sala keteıik, kezdesý «Jastar» ǵylymı-zertteý ortalyǵynda ótken bolatyn, dep habarlaıdy QazAqparat.
«Bıylǵy Elbasynyń birqatar bastamalarynyń aıasynda aldymyzda atqaratyn úlken jumystar bar. Memleket basshysynyń jaqynda jarııalanǵan «Bolashaqqa baǵdar: rýhanı jańǵyrý» atty baǵdarlamalyq maqalasynda qamtylǵan máselelerdiń barlyǵyn sanadan durys saraptap ótkizý kerek. Maqaladaǵy oı-tujyrymdar birinshi kezekte jastarǵa arnalyp otyrǵandyǵy anyq. Sondyqtan búginde basty maqsattardyń biri - ol jańǵyrý jolyndaǵy jastar ınstıtýttarynyń róli men ornyn aıqyndaý. Bul rette olardyń múmkindikteri men áleýetin kúsheıtý arqyly, jastarymyzǵa qundylyqtar men ulttyń maqsat-murattaryn durys jetkize alýymyz mańyzdy», - dep toqtaldy vıtse-mınıstr «Jastar» ǵylymı-zertteý ortalyǵynyń bastamasymen ótken kezdesýde.
Osy oraıda Núkenov jastar resýrstyq ortalyqtary arqyly jas býynmen aqparattyq jumystardy júrgizý ózekti ekenin aıta kele, búginde atalǵan ortalyqtardyń múmkindikteri tolyq paıdalanylmaı jatqandyǵyn qadap aıtty. Buǵan áleýmettik saýalnamalar men jergilikti jerlerdegi kezdesýler de dálel bolyp otyr.
«Biz jastar resýrstyq ortalyqtarynyń áleýetin paıdalanýdy laıyqty deńgeıge shyǵarýymyz kerek. Bul turǵyda jastar ortasyndaǵy jaǵdaıdy tyńǵylyqty zertteýge erekshe mán berýge tıistimiz. Árıne, kadrlyq áleýetti kúsheıtý qajet, sondyqtan ortalyqtardyǵy mamandardyń biliktiligin arttyrýǵa nazar aýdarýdamyz», - dedi ol.
Budan bólek, vıtse-mınıstr vedomstvo men óńirlerdegi jastar saıasaty máseleleri jónindegi basqarmalarymen jumystardy úılestirýdi kúsheıtý qajettigin atap ótti.
«Bul baǵytta eleýli sharalardy atqarý kerek. Bizge jumys ádisteri men qadamdar únemi jetildirip otyrǵan abzal. Jastardy jańa tehnologııalarǵa baýlýǵa, jastar kásipkerligin damytýǵa aıryqsha nazar aýdarý ózekti bolyp otyr», - dedi Núkenov.
Munymen qosa ol óńirlik basqarmalardyń ókilderine eńbek naryǵy boıynsha, suranysqa ıe jańa mamandyqtar týraly jastarǵa tolyq aqparat berý baǵytynda jumystardy belsendi atqarý kerektigin jetkizdi.
«Osyǵan baılanysty biz «Túlekter taqtasy» atty arnaıy jobany ázirleýmen aınalysyp jatyrmyz. Búginde onyń tujyrymdamasy daıarlanyp jatyr. Ary qaraı ony múddeli memlekettik organdardyń talqylaýyna usynamyz. Buǵan óńirlerdegi jastar saıasaty basqarmalarynyń da belsendi qosylýyna shaqyramyz. Bul turǵyda aqparattyq taqtany qurmaqpyz. Oqýdy támamdar aldyndaǵy sońǵy bir jyl boıy qajetti aqparatty osy júıeden alý múmkindigi jasalady dep kútilýde. Balalardyń ózine laıyqty mamandyqty durys tańdaýynda tıisti qoldaý bolýy kerek», - dep túıindedi vıtse-mınıstr.
