Túlekter keshine tyıym: Túrkistan oblysynda tártip buzylsa mektep basshylary qatań jazalanady
TÚRKІSTAN. KAZINFORM — Túrkistan oblysynda sońǵy qońyraý kezinde 2000-ǵa jýyq polıtseı tártipti qadaǵalaıdy.
Túrkistan oblysyndaǵy 1106 mektepte 550 myńnan astam oqýshy bilim alady. Onyń ishinde bıyl 9-synypty 47 174 oqýshy, al 11-synypty 35 294 túlek támamdaıdy.
Oblystyq bilim basqarmasynyń basshysy Ǵalymjan Orynov mektep bitirýshiler úshin qatań shekteýler engizilgenin málimdedi.
— Oqý-aǵartý mınıstrligi men oblys ákimdiginiń birlesken qaýlysyna sáıkes, 25 mamyrda kafe-meıramhanalardaǵy banketterdi, avtokortejderdi, tabıǵat aıasynda jáne demalys bazalarynda tańdy qarsy alý keshterin uıymdastyrýǵa qatań tyıym salynady. Sonymen qatar oqýshylar men ata-analardan qandaı da bir sebeppen aqsha jınaýǵa, mektepke nemese muǵalimderge syılyq berýge jol berilmeıdi, — dedi spıker.
Vedomstvo málimetinshe, attestat tapsyrý rásimderi tek bilim berý uıymdarynyń qabyrǵasynda resmı formatta ótedi.
— Eger qandaı da bir mektepte zańsyz aqsha jınaý, mektepten tys kesh ótkizý nemese oqýshylardyń kólik jaldap, sherýler men avtokortej uıymdastyrý derekteri anyqtalsa, sol mekteptiń dırektoryna qatań tártiptik sharalar qoldanylady. Bul týraly barlyq bilim berý uıymynyń basshylaryna resmı túrde eskertildi, — dedi Ǵalymjan Orynov.
Sondaı-aq oblystyq polıtsııa departamenti qoǵamdyq qaýipsizdik basqarmasy basshysynyń orynbasary Álıhan Alentaev sońǵy qońyraý kúni óńirde quqyq buzýshylyqtyń aldyn alý úshin keń kólemdi profılaktıkalyq jumystar júrgiziletinin aıtty.
— Bul sharalarǵa 2000-ǵa jýyq polıtsııa qyzmetkeri men 400 qyzmettik avtokólik jumyldyrylady, — dedi ol.
Budan buryn Shymkentte oqý jylynyń aıaqtalýy qarsańynda polıtsııa men beıindi vedomstvolar kúsheıtilgen jumys rejımine kóshkenin jazǵan edik.
