Túlekter keshin ótkizýge tyıym salynady – elorda ákimdigi

Nur-Sultan ákimdiginen málim etkendeı, attestat oqý oryndarynyń aýlalarynda tapsyrylady. Odan keıin aǵash otyrǵyzý rásimi ótedi.

«Elordada karantın rejıminiń saqtalýyna baılanysty atalmysh is-sharalar barlyq sanıtarlyq normalardy saqtaı otyryp, mektep aýlalarynda ótedi. Oqýshylar rásimge mektep formasymen qatysady. Attestat tapsyrǵannan keıin «túlekter alleıasynda» kóshet otyrǵyzý aktsııasy josparlanǵan. Nur-Sultan qalalyq bilim basqarmasy eskertedi: mektep bitirý keshterin ótkizýge qatań tyıym salynady», – dedi qalalyq Bilim basqarmasynyń baspasóz hatshysy Altynaı Zarlyqqyzy.

Bıyl 6 199 oqýshy nemese oqýshylardyń jalpy sanynyń 95% ulttyq biryńǵaı test (UBT) tapsyrady. Onyń ishinde 3 665 - qazaq, 2 495 - orys, 39 - aǵylshyn tilinde. Bul rette, UBT ótkizý formaty ózgerissiz qalady, uzaqtyǵy - 3 saǵat 50 mınýt. Test eki bloktan – 3 negizgi pán (20 tapsyrma) jáne 2 beıindik pánnen (30 tapsyrma) turady.

UBT-ǵa 11-shi synyptyń tórtinshi toqsanynyń tapsyrmalary engizilmeıdi.

«Karantın rejımin eskere otyryp, test bastalar aldynda emtıhan tapsyrýshylardyń temperatýrasy ólshenip, oqýshylar arasynda qaýipsiz qashyqtyq saqtalady. Sondaı-aq qosymsha sanıtarlyq sharalar qabyldanady. Budan basqa, oqýshylardy UBT ótetin jerge tegin jetkizý qamtamasyz etiledi. Ata-analar óz balalarynyń ýaqytynda kelýin jáne qaýipsizdigin qamtamasyz etýge mindetti. UBT bastalǵanǵa deıin ǵımarattardyń órtke qarsy qaýipsizdigi tekseriledi, medıtsınalyq kómek jáne quqyqtyq tártipti qorǵaý uıymdastyrylady», - delingen ákimdik aqparatynda.

Bıyl «Altyn belgige» - 359, úzdik attestatqa 379 túlek úmitker.