Túlekter 100% jumyspen qamtylady: ІІM talapkerlerdi oqýǵa shaqyryp otyr
ASTANA. KAZINFORM – Іshki ister mınıstrliginiń joǵary oqý oryndarynda bilim alýdyń qandaı artyqshylyqtary bar? Bul saýalǵa mınıstrliktiń resmı ókili Shyńǵys Alekeshev jaýap berdi.
«Kýrsanttar memlekettik tapsyrys negizinde bilim alady, tegin tamaqpen, jatyn ornymen qamtamasyz etiledi. Sonymen qatar olarǵa tegin medıtsınalyq qyzmet kórsetiledi. Oqý oryndarynda jattyǵý jáne sport zaldary qarastyrylǵan jáne stıpendııa alady. Oqý merzimi áskerı qyzmet ótkerýmen teńestiriledi, eń bastysy, túlekter 100% jumyspen qamtylady», - dedi Shyńǵys Alekeshev vedomstvoda ótken onlaın brıfıngide.
Sondaı-aq, mınıstrlik ókiliniń aıtýynsha, oqý aıaqtalǵannan keıin Ulttyq qaýipsizdik jáne áskerı ister bakalavry, polıtsııa leıtenanty ataǵy beriledi.
«Kýrsanttardy oqytýdyń ártúrli ınteraktıvti ádisteri qoldanylady. Bul praktıkalyq jaǵdaılardy sheshý, qylmystyq jáne ákimshilik isterdiń, qyzmettik jáne is júrgizý qujattarynyń maketterin jasaý taǵy sol sııaqty. Oqýdy aıaqtaǵan túlek ishki ister organdarynda jumys isteýge tolyq daıyn bolyp shyǵady», - deıdi ol.
Buǵan deıin Іshki ister mınıstrligine qarasty joǵary oqý oryndaryna túsý úshin qoıylatyn talaptarǵa toqtalǵan edik.
