Túlek kadetter armııada praktıkalyq tájirıbe jınaýda (FOTO)

ASTANA. QazAqparat - «Ońtústik», «Shyǵys», «Batys» óńirlik qolbasshylyqtarynyń áskerı bólimderinde, Aeroutqyr áskerlerinde úsh aı boıy Kadet korpýsynyń oqý baǵdarlamasyn bitirýshi rota kadetteriniń áskerı taǵylymdamasy ótkiziledi.

«Kadetter motoatqysh jáne desanttyq-shabyldaý bólimsheleri, teńiz jaıaý áskeri bólimsheleri, tank komandırleri laýazymdarynda taǵylymdamadan ótýde. Áskerge kelisimen áskerı ortaǵa beıimdelý maqsatynda kadettermen oqý-ádistemelik jıyndar ótkizildi. Olardan atys jáne dene daıarlyǵy boıynsha synaq qabyldandy, taǵylymdamadan ótýshilerge anaǵurlym tájirıbeli serjanttar sanynan tálimgerler bekitildi», dep habarlaıdy Qorǵanys mınıstrliginiń baspasóz qyzmeti.

Áskerı taǵylymdama barysynda kadetter jeke quramdy basqarýda, jaýyngerlik daıarlyq boıynsha sabaqtardy, bólimsheler men vzvodtardyń jaýyngerlik oq atýlaryn ótkizýde, urysty tekserýde jáne atys qarýyn qalypty urysqa keltirýde praktıkalyq daǵdy alady.

200-ge jýyq kadet sheberlikteri men praktıkalyq daǵdylaryn jetildiredi. Olar áskerı tehnıka men qarý-jaraqty paıdalaný, jóndeý jáne baptap kútý jónindegi daǵdylaryn jınaqtap, shyńdaıdy.

Kadet korpýsynyń túlekteri úshin bul jańa praktıkalyq tájirıbe jáne naǵyz áskerı qyzmetti kórýdiń alǵashqy múmkin. Jarty jyldan soń olardyń árqaısysy óz qyzmetin bastaıdy.