TÚQJB tóraıymynyń otstavkasy - Elbasy tapsyrmasymen júrgizilgen kompanııany ókilettigin teris paıdalanatyndardan tazalaýdyń logıkalyq kezeńi
Este bolsa, ótken aptada Elbasy atalǵan bank tóńireginde oryn alyp otyrǵan túıtkilderdi túzetýge tapsyrma bergen bolatyn. QR Prezıdentiniń alǵa tartqan derekterine qaraǵanda, banktiń qarjysy esebinen boı kótergen 264 páterli «Áıgerim» turǵyn úı kesheninen ákimdikte turǵan birde bir adam baspana almaǵan. Al bul ýaqytta atalǵan turǵyn úıdegi páterler kompanııa basshylyǵynyń týǵan-týystaryna berilgen. «Biz sonda bankti onyń qyzmetkerleri úshin qurdyq pa?», - dep keıigen bolatyn Memleket basshysy. Osy rette QR Prezıdenti «Báıterek» UBH basshysy Qýandyq Bıshimbaevtan turǵynúıqurylysjınaq júıesin tártipke keltirýdi talap etken edi. Aıta keterligi, Bıshimbaev aǵymdaǵy jyldyń mamyrynda qurylǵan holdıngke basshylyq jasaıdy. Onyń aldyna holdıng qurylymyna kiretin «Qazaqstannyń Damý banki», «Turǵyn úı jınaq banki», «Qazaqstandyq ıpotekalyq kompanııa», «Qazyna Kapıtal menedjment» kompanııalary jumystarynyń tıimdiligin arttyrý mindeti júktelgen.
17 qazanda «Báıterek» tóraǵasy «Turǵynúıqurylysjınaqbanki» basshysy Nurbıbi Naýryzbaevanyń otstavkaǵa ketkendigin, Prezıdenttiń tapsyrmasyn eskere otyryp júıe jańǵyrtylatyndyǵyn málim etti.
«Biz bul máseleni osy baǵytqa basshylyq etetin barlyq memlekettik organdarmen birlesip jumys atqaratyn bolamyz. Páter bólý kezinde áleýetti baǵdarlamaǵa qatysýshylarda baspanasynyń bolmaýy jáne turǵyn úı jaǵdaıyn jaqsartýǵa muqtaj bolýy sekildi faktorlar eskeriletin bolady», - dedi ol. Baspanasy bar turǵyndar ekinshi kezekte qarastyrylady.
