Tuqymǵa sýbsıdııa berý erejeleri ózgertildi – QR AShM
QOSTANAI. QazAqparat – Qostanaı qalasynda QR Aýyl sharýashylyǵy vıtse-mınıstri Rústem Qurmanovtyń qatysýymen egis naýqanyna daıyndyq barysy týraly keńes ótti, dep habarlaıdy QazAqparat.
Keńes barysynda egis naýqanynyń jospary, tuqym sapasy men aýyl sharýashylyǵy tehnıkasyn daıyndyǵy jáne otyn qory talqylandy. Sondaı-aq QR AShM ókilderi tuqym sharýashylyǵyn qoldaý jáne tuqym tazalaıtyn tehnıkany satyp alý úshin ınvestıtsııalyq sýbsıdııalaý erejelerine engizilgen ózgerister týraly málim etti. Rústem Qurmanovtyń aıtýynsha, eger buryn fermerlerge tek ımporttyq tuqym tazalaıtyn tehnıkany satyp alýǵa ǵana sýbsıdııa berilse, endi otandyq jáne ýkraınalyq, sondaı-aq TMD elderiniń ónimderin satyp alýǵa jumsalǵan shyǵyndar da óteledi.
«Sharýalardyń ótinishi boıynsha tuqymǵa sýbsıdııa berý erejeleri ózgertildi. Endi sýbsıdııany Qazaqstanda jáne sheteldik óndirýshilerden tikeleı satyp alǵan barlyq sharýalar ala alady. Eski erejede bul qarastyrylmaǵan bolatyn. Atalmysh shara sapaly tuqymdarǵa teń qoljetimdilikti qamtamasyz etedi», - dedi QR AShM vıtse-mınıstri.
Jıyn barysynda Rústem Qurmanov mıneraldy tyńaıtqyshtardy qoldaný máselesine toqtaldy. 2020 jyly respýblıka boıynsha jergilikti bıýdjetterde mıneraldy tyńaıtqyshtardy satyp alýdy sýbsıdııalaýǵa 23 mlrd teńgeden astam qarjy qarastyrylǵan.
