TÚKSh nysandaryn kontsessııaǵa birtindep engizý modeli usynyldy
ASTANA. QazAqparat - Mınıstrlik óńirlermen jáne Eýropalyq qaıta qurý jáne damý bankimen birlese otyryp barlyq yqtımal qaýip-qaterler men kommýnaldyq ınfraqurylymdardyń damý tájirıbesin eskerip, Turǵyn úı-kommýnaldyq sharýashylyq (TÚKSh) nysandaryn kontsessııaǵa birtindep jáne kezeń-kezeńimen engizý modelin usynady. Bul týraly Úkimet otyrysynda memlekettik-jekeshelik áriptestik máselesi týraly baıandaý barysynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
Onyń aıtýynsha, TÚKSh nysandary 3-5 jyl merzimine senimdi basqarýǵa beriledi. Ol elimizdiń «Memlekettik-jekemenshik áriptestik týraly» zańynda áriptestiktiń bir túri retinde kórsetilgen.
«Bul kezeńniń maqsaty -kásiporyndy qalpyna keltirý, appattyq jaǵdaılar men shyǵyndy azaıtý, tólemderdi jınaýdy qamtamasyz etip, kiristi arttyrý arqyly tıimdilik ındıkatorynyń kórsetkishine jetý. Sonymen qatar, bul kezeńde nysannyń aldyn-ala ınvestıtsııalyq tartymdylyǵyn baǵalaý jumysy júzege asyrylady.
Ekinshi kezeńde TÚKSh nysany kontsessııaǵa 10-30 jyl merzimine deıin beriledi. Bul turǵyda memlekettik-jekeshelik áriptestik nysanyn qaıta qalpyna keltirý jáne olardy jańǵyrtý úshin jeke ınvestıtsııalar men energııalyq tıimdilik tehnologııalaryn tartý eskerilgen»,-dep atap ótti Jeńis Qasymbek.
Qazirgi ýaqytta elimizdiń barlyq óńirlerinen memlekettik-jekeshelik áriptestik boıynsha 39 qanatqaqty joba iriktelip alyndy. Onyń ishindegi eń mańyzdy jobalardyń biri - Aqtóbe men Qyzylorda qalalaryndaǵy TÚKSh nysandaryn senimdi basqarýǵa tabystaý. Ol Eýropalyq qaıta qurý jáne damý bankimen yntymaqtasýdyń arqasynda júzege asyrylady. Budan bólek, Mańǵystaý oblysyndaǵy tuşytqysh zaýytynyń qurylysy da kontsessııa jobasyna kiredi. Qazir onda konkýrstyq rásimder júrgizilýde.
«Qanatqaqty jobalardy sátti júzege asyrý turǵyn úı-kommýnaldyq sharýashylyqtyń barlyq sektorynda osy tájirıbeni qoldanýǵa, salaǵa jeke ınvestıtsııalar tartýǵa, turǵyn úı-kommýnaldyq sharýashylyqty basqarýdy jaqsartýǵa jáne memlekettik bıýdjetke túsetin salmaqty azaıtýǵa múmkindik beredi»,-dedi QR Investıtsııalar jáne damý mınıstri.
