Týystardyń atyna múlik rásimdegender qalaı tekseriledi – aktıvterdi qaıtarý
ASTANA. KAZINFORM – Qymbat múlikti týystarynyń nemese basqa adamdardyń atyna rásimdeý aktıvterdi qaıtarýdan tys qaldyrmaıdy. Mundaı jaǵdaıda quqyq qorǵaý organdary múliktiń zańdy ıesi men naqty baqylaýshysy arasyndaǵy baılanysty, sondaı-aq tulǵalar men olardyń aktıvteriniń ózara baılanysyn zerdeleıdi.
Bul týraly QR Bas prokýratýrasy Aktıvterdi qaıtarý qyzmetiniń basshysy Nurdáýlet Súıindikov «Bizdin orta» podkastynda aıtty.
Onyń aıtýynsha, zańda mundaı jaǵdaılar arnaıy qarastyrylǵan. Múlik basqa adamnyń atyna rásimdelgen kezde «baılanysty tulǵalar» uǵymy qoldanylady. Oǵan jaqyn týystarmen qatar nomınaldy tulǵalar, bıznes-seriktester jáne basqa da baılanysty sýbektiler kirýi múmkin.
– Bul tetiktiń maqsaty – aktıvtiń naqty baqylaýshysy men zańdy ıesiniń arasyndaǵy baılanysty anyqtaý. ıAǵnı qymbat múlikti basqa adamnyń atyna rásimdeý onyń aktıvterdi qaıtarý júıesinen avtomatty túrde tys qalatynyn bildirmeıdi. Bir adamnyń aınalasyndaǵy birneshe kompanııany tekseremiz, – dedi Nurdáýlet Súıindikov.
Spıker atap ótkendeı, jınalǵan aqparat negizinde túpkilikti sheshimdi prokýratýranyń ózi ǵana qabyldamaıdy. Barlyq materıal Aktıvterdi memleketke qaıtarý máseleleri jónindegi arnaıy komıssııanyń qaraýyna shyǵarylady.
Komıssııany Premer-mınıstr basqarady. Onyń quramyna Quryltaı depýtattary, qoǵamdyq uıymdardyń ókilderi, memlekettik organ basshylary jáne basqa da tulǵalar kiredi. Jalpy quramynda 20-ǵa jýyq adam bar.
– Dál osy quram kúdikke alynǵan adamdy arnaıy tizilimge qosý ne qospaý týraly sheshim shyǵarady. Eger adam arnaıy tizilimge qosylsa, ári qaraı aktıvterdi qaıtarý boıynsha egjeı-tegjeıli jumys bastalady, – dedi Nurdáýlet Súıindikov.
Aıta keteıik, Qazaqstanda zańsyz ıemdenilgen aktıvterdi memleketke qaıtarý tetigi 2023 jylǵy 12 shildede qabyldanǵan arnaıy zańmen retteledi.
Aktıvterdi qaıtarý tetigi, eń aldymen, joǵary memlekettik laýazym atqarǵan nemese atqaratyn tulǵalarǵa, kvazımemlekettik sektor sýbektilerine jáne olarmen úlestes tulǵalarǵa qatysty qoldanylady.
Podkast qonaǵynyń tolyq suhbatyn myna jerden oqýǵa bolady.
