Týystar men dostar aýdarǵan aqshaǵa salyq salyna ma
ASTANA. KAZINFORM — Qazaqstanda týystar men dostardan nemese syılyq retinde alynǵan aqshaǵa salyq salynbaıdy. Qandaı jaǵdaıda aqsha aýdarymdaryna salyq salynbaıtynyn QR Qarjy mınıstrligi Memlekettik kirister komıtetiniń Jeke tulǵalardyń kiristerin ákimshilendirý basqarmasynyń sarapshysy Danagúl Saǵynbek túsindirdi.
Mamannyń aıtýynsha, eń aldymen aqshanyń qandaı maqsatta aýdarylǵany eskeriledi. Eger qarajat jeke qajettilik úshin berilse, ol salyq salynatyn tabys retinde eseptelmeıdi.
— Týystar arasynda jeke maqsatta jasalǵan aqsha aýdarymdaryna salyq salynbaıdy. Dál osyndaı tártip dostardan nemese syılyq retinde alynǵan qarajatqa da qoldanylady. Osylaısha, aqsha jeke qajettilik úshin aýdarylsa, odan jeke tabys salyǵyn tóleý talap etilmeıdi, — dedi Danagúl Saǵynbek.
Sarapshy mobıldi aýdarymdarǵa qatysty habarlama alǵan azamattardyń salyq organdaryna barýy qajet pe degen suraqqa da jaýap berdi.
— Aqparattyq push-habarlamaǵa jaýap berýdiń nemese salyq organyna arnaıy barýdyń qajeti joq. Al kameraldyq baqylaý nátıjesinde habarlama kelse, azamat salyq eseptiligin tapsyrýy tıis. Eger anyqtalǵan sáıkessizdiktermen kelispese, túsinikteme bere alady. Munyń barlyǵyn salyq tóleýshiniń jeke kabıneti arqyly jasaýǵa bolady, — dep qosty ol.
Eske salaıyq, 8 qarashadan bastap Qazaqstanda mobıldi aýdarymdardy baqylaý talaptary ózgerdi.
