Týysy pyshaqtap tastaǵan astanalyq aǵaıyndylardyń jaǵdaıy belgili boldy

ASTANA. KAZINFORM – Elordada jas jigit 4 adamdy pyshaqtaǵan. Onyń bireýi oqıǵa ornynda mert boldy, qalǵan úsheýi qazir aýrýhanada jatyr. 

Qalalyq Densaýlyq saqtaý basqarmasynyń málimetinshe, jedel járdem jaraqat alǵan jandardy № 1 kópsalaly qalalyq aýrýhanaǵa jetkizdi.

— Tekserý nátıjesinde 1964 jylǵy áıeldiń denesiniń ártúrli bólikterinde birneshe jerden tesilgen jaralar anyqtaldy, sonymen qatar sol jaqtaǵy qabyrǵa synǵan. Aýrýhanaǵa aýyr jaǵdaıda jatqyzyldy jáne operatsııa jasaldy, qazir patsıent qarqyndy terapııa bólmesinde jatyr. Sondaı-aq 1974 jyly týǵan áıeldiń denesi pyshaqpen ártúrli jerden tesilgen, denesi kógergen, sol sııaqty bas jaraqatyn alǵan jáne oń jaq qabyrǵasy synǵan. Jalpy jaǵdaıy ortasha, turaqty, - delingen habarlamada.

Odan bólek, 18 jastaǵy qyz zardap shekken. Elordalyq dárigerler onyń da birneshe jerden pyshaq jaraqatyn alǵanyn aıtyp otyr, qazir patsıent aýrýhanada hırýrgııa bólimine jatyr.

— Jalpy jaǵdaıy ortasha, turaqty, - deıdi densaýlyq saqtaý basqarmadan.

Buǵan deıin habarlaǵanymyzdaı, elordada 21 jastaǵy jigit tórt birdeı týysyn pyshaqtap tastaǵan. 

Oqıǵaǵa kýá bolǵandardyń aıtýynsha, úıdegi janjal Free Fire oıynynan týyndaǵan. Mustafın 21\5 mekenjaıyndaǵy úıde tańǵy saǵat 4.00 kezinde 21 jastaǵy turǵynnyń telefonyn úıdegi týystary tartyp alady. Soǵan ashýlanǵan jigit týystary uıqyǵa ketken kezde pyshaqpen shabýyldaǵan. Saldarynan 1997 jylǵy aǵasy oqıǵa ornynda jan tapsyrǵan. Al qalǵan 3 adam aýyr jaraqatpen aýrýhanaǵa túsken.