Týyndylardy paıdalanǵany úshin syıaqy tóleý tártibin jetildirý máselesi kóterildi
ASTANA. KAZINFORM — Ádilet mınıstrliginde týyndylardy paıdalanǵany úshin tólenetin syıaqyny retteý máseleleri talqylandy.
Sharada Ádilet vıtse-mınıstri Botagóz Jaqselekova Qazaqstan Kásipkerleriniń quqyqtaryn qorǵaý jónindegi ýákili Qanat Nurovpen jáne Qazaqstandaǵy Samsung kompanııasynyń ókilderimen jumys kezdesýin ótkizdi.
Kezdesý barysynda taraptar týyndylardy jeke maqsatta qaıta shyǵarý úshin tólenetin syıaqyny quqyqtyq retteý máselelerin, osyndaı qaıta shyǵarý úshin paıdalanylatyn jabdyqtar men materıaldyq jetkizgishterdiń tizbesin qalyptastyrý tásilderin, sondaı-aq osy salany retteýdiń halyqaralyq tájirıbesin talqylady.
Quqyq ıelenýshilerdiń, tutynýshylardyń, tıisti jabdyqtardy daıyndaýshylar men ımporttaýshylardyń múddeleri arasyndaǵy teńgerimdi qamtamasyz etý, sondaı-aq kásipkerlik qoǵamdastyqqa artyq júkteme túsirmeıtin ashyq ári boljamdy tetikterdi qalyptastyrý qajettiligine erekshe nazar aýdaryldy.
Kezdesý qorytyndysy boıynsha taraptar aqparat almasýdy jalǵastyrýǵa jáne avtorlyq quqyq pen sabaqtas quqyqtar salasynda teńgerimdi sheshimderdi ázirleý boıynsha birlesken jumysty jalǵastyrýǵa kelisti.
Qatysýshylar Qazaqstandaǵy zııatkerlik menshik salasyn odan ári damytý úshin memleket, bıznes jáne quqyq ıelenýshiler arasyndaǵy ashyq dıalogtyń mańyzdylyǵyn atap ótti.
Aıta ketelik Konstıtýtsııada avtorlyq quqyq pen zııatkerlik menshikti qorǵaý kúsheıtiletini týraly jazǵan edik.
