Týǵannan jatyry joq 22 jastaǵy kelinshek bala kóterdi

Bul jaıynda túrik dárigerleri habarlady.

Týǵannan jatyry joq qyzǵa osy olqylyqtyń ornyn toltyrý úshin jasalǵan operatsııa osydan eki jyl buryn sátti aıaqtalǵan bolatyn. Uzaq ýaqytqa sozylǵan emdeý sharalarynan keıin oǵan ana bolý baqyty buıyrdy.

Bul arada osyndaı kúrdeli operatsııany sátti aıaqtaǵan mamandardyń jetistigin aıtpaı ketýge bolmaıdy. Donorlyq organ bóten aǵzaǵa sátti qondyrylǵan kúnniń ózinde áıeldiń bala kótere qoıýy ekitalaı edi.

muslim.kz habarlaýynsha, perzent súıý baqytyna ıe bolǵan 22 jastaǵy Derııa Serttiń jasandy jolmen uryqtandyrylǵanyn aıta ketý kerek. Osylaısha, ol donorlyq jatyrmen bala tabatyn alǵashqy áıel bolaıyn dep tur.

Ótken jyly mundaı jaǵdaı Shvetsııada da bolǵan. Shved dárigerleri eki áıeldiń jatyryn qyzdaryna salyp, operatsııany sátti aıaqtaǵan edi. Alaıda, olardyń bala kótergeni nemese kótermegeni týraly aqparat joq.