Týǵanyna 100 jyl: elordadaǵy mektepke Raqymjan Qoshqarbaevtyń aty berildi
ASTANA. KAZINFORM - Reıhstagqa jeńis týyn tikken Raqymjan Qoshqarbaevtyń týǵanyna bıyl 100 jyl. Jeńis kúni qarsańynda dańqty erdiń esimi elordadaǵy №44 mektepke berildi, – dep habarlaıdy 24kz arnasy.
Mektepte memorıaldy eskertkish taqta men áskerı synyp ashyldy. Erligi barshaǵa aıan qaharmannyń esimi osylaı ulyqtaldy.
"Otan úshin otqa tús, kúımeısiń» degen qazaqta maqal bar. Sol sııaqty bizdiń mıssııamyz – óskeleń urpaqtarymyzdy patrıottyq tárbıege baýlý", - dedi Raqymjan Qoshqarbaev atyndaǵy №44 mektep dırektory Lázzat Qultaeva.
Saltanatty is-sharaǵa batyrdyń týystary da qatysty. Olar bul sátti kóp kútkenin aıtady. Aıbyndy erdiń kózi tirisinde syı-qurmet bylaı tursyn, erligi eskerilmegendigi de aıtylyp qaldy.
"Týdy tikkende qaharman atyn berdi ǵoı. Batyrlyqty bergen joq. Bermegeni – ákesi Qoshqarbaıdy kýlak dep, vrag naroda dep, atamyzdyń jerin alyp qoıǵan da, kári kisi bolǵan. Jabýǵa jaramaǵan. Endi bireýdi jabý kerek qoı. Atasy Qoshqarbaıdy alyp ketken", - dedi Qoshqarbaevtyń kelini Qalam Temirova.
Raqymjan Qoshqarbaev kózi tirisinde ózi jaıynda aıtyp, jarııa qylmaǵan. Sodan tarıh barynsha burmalanyp, erligi eskerilmeı keldi. Ol ómirden ótkennen keıin araǵa tek 11 jyl salyp, batyrǵa "Halyq Qaharmany" ataǵy berildi.
"Ómiri aıtpaıtyn. Soǵys týraly sózdi bólip jiberetin. Soǵys týraly sender aıtpańdarshy, kórmeńdershi. Sender bilmeı-aq qoıyńdarshy dep. Men ózimniń patrıottyq boryshymdy oryndadym. Maǵan buıryq berdi. Men buıryqty oryndadym deıtin", - dedi Qoshqarbaevtyń nemere qaryndasy Marjan Nurmaǵanbetova.
Bıyl el boıynsha Rahymjan Qoshqarbaevtyń 100 jyldyq mereıtoıy atap ótiledi. Osyǵan oraı, soǵys ardageriniń ómirinen syr shertetin kórmeler ashylady. Al jaqynda Aqmola oblysy Taıtóbe aýylynda batyrdyń bıýstin ornatý josparda bar. Buǵan deıin Memleket basshysy Qasym-Jomart Toqaev kórnekti tarıhı tulǵalardy qurmetteý mańyzdy ekenin aıtqan bolatyn.
"Aıbyn ordeni kádimgi áskerı erligi úshin beriletin orden. Onyń úlken sımvoldyq máni bar dep aıtýǵa bolady. Biz ózimizdiń tarıhı Qazaqstannyń murageri retinde bizdiń batyrlarymyzdyń murageri dep kórsetip jatyrmyz", - dedi Májilis depýtaty Erkin Ábil.
Syn saǵatta elin qorǵaǵan arda¬ger¬lerimizdi qurmetteý – paryz. Al búginde batyrdyń erligi eskerýsiz qalmady. ІІІ dárejeli Aıbyn ordeni endi Raqymjan Qoshqarbaev esimimen atalatyn boldy.