Týǵan jerińniń tarıhyn, ana tilińdi, óz tegińdi bilmeı turyp, naǵyz patrıot bola almaısyń - QR Prezıdenti

Bul týraly Aqordanyń baspasóz qyzmeti habarlady.

Memleket basshysymen kezdesýge oqýda, sport pen shyǵarmashylyqta úzdik nátıje kórsetken on birinshi synyptyń 22 oqýshysy qatysty. Olar qalalyq, respýblıkalyq, halyqaralyq olımpıadalardyń, zııatkerlik oıyndar men ǵylymı jobalar baıqaýynyń júldegerleri bolyp sanalady.

Qazaqstan Prezıdenti oqýshylardy jańa oqý jylynyń bastalýymen quttyqtap, búkil elimiz boıynsha 7700 oqý orny esigin ashyp, 2 mıllıon 540 myń oqýshy partaǵa otyrǵanyn atap ótti.

- 1 qyrkúıekte 77 jańa mektep, sonyń ishinde 5 Nazarbaev zııatkerlik mektebi ashyldy, al jyl sońyna deıin taǵy 82 oqý orny beriletin bolady. Mundaı bizdiń eldiń tarıhynda eshqashan bolyp kórgen emes. Táýelsizdik jyldary elimizde 6 mıllıonnan astam bala dúnıege keldi. Men belgilep bergen Qazaqstannyń 2050 jylǵa deıingi damý Strategııasyn dál senderdiń býyndaryń iske asyratyn bolady. Búginde elimiz qarqyndy damýda. Senderdiń ata-analaryń men barlyq azamattarymyzdyń birlesken jumysy arqasynda biz Qazaqstannyń tabystaryn kúlli álemge kórsettik, - dedi Nursultan Nazarbaev.

Memleket basshysy oqýshylarmen týǵan elge degen súıispenshilik, qazaqstandyq patrıotızmniń negizderi týraly áńgimelesti.

- Sender patrıotızmniń óz jerińe, týys-týǵandaryń men jaqyndaryńa, halyq pen el ıgiligi úshin jumysqa degen súıispenshilik retindegi túrli uǵymyn ashyp berdińder. Otanǵa degen súıispenshilik memlekettik rámizderdi qurmetteýden bastalady. Memlekettik Tý tarıhty, halqymyzdyń dástúrlerin aıshyqtaıdy, sondaı-aq alǵa qoıǵan barlyq maqsatymyz ben mindetimizge qol jetkizýge degen jas ulttyń umtylysyn beıneleıdi. Eltańba juldyzdy shańyraq beınelengen bizdiń ortaq úıimizdiń sımvolyn bildiredi - bul beıbitshilik pen týǵan jerdi qaýip-qaterden qorǵaýdyń ejelgi úlgisi. Patrıotızmdi ultshyldyqpen shatastyrýǵa bolmaıdy. Patrıot - óz elin súıetin jáne ózge memleketterge qurmetpen qaraıtyn adam. Ekinshi dúnıejúzilik soǵystyń qasiretti tájirıbesi patrıotızmnen ultshyldyqqa ótýdiń qaýipti ekenin, sondaı-aq ózge halyqty kemsitpeı, óz elińdi súıý qajettigin naqty kórsetip berdi. Osyndaı baǵdarmen ómir súrý qajet, - dedi Qazaqstan Prezıdenti.

Patrıotızmniń erekshe kórinisi retinde Nursultan Nazarbaev elimizdiń tabysty damýynyń sımvoly bolyp sanalatyn elordamyz - Astanaǵa degen súıispenshilikti atady.

- Eń qıyn jyldary biz elordany aýystyrý týraly sheshim qabyldadyq. Jáne 10 jyl ishinde elordany damytýdyń barlyq negizgi baǵyty aıqyndaldy, kóptegen ǵımarat salynyp bitti. Endi bizdiń kúlli álemge tanymal elordamyz bar. Munda ǵylym men bilim, medıtsına qarqyndy damı bastady, qala turǵyndary men qonaqtary úshin ómir súrý deńgeıi jaqsardy jáne qyzmet kórsetýdiń joǵary standarttary jasaldy. Qazaqstandyqtar óz elordasyn maqtanysh ete alady. Qala odan ári damı beredi. Mysaly, EKSPO-2017 búkilálemdik kórmesin ótkizý úshin tamasha ǵımarattary bar múlde jańa ortalyqtar, ǵylym men tehnıka ǵımarattary salynatyn bolady, - dedi Memleket basshysy.

Buǵan qosa, Nursultan Nazarbaev jas býynǵa patrıottyq tárbıe berýde óz elimiz ben týǵan ólkeniń tarıhyn oqytý mańyzdy ekenin atap ótti.

- Týǵan jerińniń tarıhyn, ana tilińdi, óz tegińdi bilmeı turyp, naǵyz patrıot bola almaısyń. Qazaqstandyqtardyń týyp-ósken jeri bar, bul bizdiń Otanymyz. Elimizdiń tarıhy týraly barlyq málimetti júıelendirip, onyń birtutas nusqasyn ázirleý qajet, - dedi Qazaqstan Prezıdenti.

Memleket basshysy jaı ǵana patrıotpyn deýdiń jetkiliksiz ekenin aıtty.

- Otanǵa degen mahabbatty ispen dáleldeý kerek. Biz qazir memlekettilikti qalyptastyrý, táýelsizdikti nyǵaıtý úshin eldiń óz azamattarynyń eńbegin qajet etetin kezeńdi bastan ótkerip jatyrmyz. Árkim óz eńbegi arqyly baıyta túskende ǵana memleket qýatty bolady, - dedi Nursultan Nazarbaev.

Qazaqstan Prezıdenti tabysqa jetý jańa tehnologııalardy ıgerýge jáne olardy ózimiz ázirleýge baılanysty ekendigine de toqtaldy.

- Nelikten biz ındýstrııalandyrýmen aınalysyp jatyrmyz? Bizde paıdaly qazbalar bar, biraq onyń bári kúnderdiń kúninde taýsylady. Munaı men gaz esebinen órkendegen elder bar, mysaly, Oman. Olardyń munaıy taýsyldy, biraq oǵan deıin qamdanyp, basqa ındýstrııa quryp úlgerdi. Paıdaly qazbalary az bolsa da gúldengen ekonomıkasy bar Ońtústik Koreıa, Shveıtsarııa, Sıngapýr sekildi elderdi mysalǵa keltirýge bolady. Bul elder bilimniń esebinen damýda. Bizdiń eldiń jalpy ishki óniminiń 53 paıyzy qyzmet kórsetý salasyna tıesili. Bolashaq iri kásiporyndarda emes, tehnologııalarda, - dedi Memleket basshysy.

Nursultan Nazarbaev mektep bitirýshilerdiń ınnovatsııaǵa basymdyq beriletin jańa ekonomıkalyq jaǵdaıda ómir súretinin atap ótti.

- Búginde búkil álem munaı, gaz jáne kómirdi tutynady. Olardy paıdalaný aýany lastap, ekologııany nasharlatady, klımatty ózgertedi. Osyǵan baılanysty biz aldaǵy EKSPO-2017 kórmesi Qazaqstan úshin betburysty tus bolǵanyn qalaımyz. Álemniń ár tarapynan mamandar kelip, balama kózderden energııa óndirý ádisterin kórsetetin bolady, - dedi Qazaqstan Prezıdenti.

Óz sózderinde oqýshylar patrıotızm jónindegi jeke túsinikterin aıtyp, oqýǵa jáne keleshek mamandyǵyn tańdaýǵa qatysty josparlaryn ortaǵa saldy.

Sóz sońynda Memleket basshysy alǵa qoıǵan barlyq maqsatqa bilim men ǵylymdy damytý, sondaı-aq ózimizdiń bilikti kadrlarymyzdy daıarlaý arqyly qol jetkizýge bolatynyn atap ótti.

- Men senderge áleýmettik jelilerge kóp áýestenbeýge keńes beremin. Kompıýterdiń aldynda otyratyndar keıin kitap oqyǵandar men saýatyn kótergenderge qyzmet etetin bolady. Shyndap kelgende, adammen sóıleskende ǵana kózine qarap, onyń emotsııasyn sezinesiń. Áleýmettik jelilerde otyrmaı, kóbirek kitap oqyp, jańa bilim alý qajet, - dedi Nursultan Nazarbaev.

Sońynda Qazaqstan Prezıdenti kezdesýge qatysýshylarǵa zor densaýlyq jáne oqýda tabys tiledi.

№64 mektep-lıtseı Memleket basshysynyń bastamasymen «100 mektep, 100 aýrýhana» baǵdarlamasy aıasynda 1200 adamǵa arnalyp salynǵan.

2012-2013 oqý jylynda mektep-lıtseı oqýshylary jalpy bilim beretin pánder boıynsha olımpıadalar men konkýrstardan 71 júldeli oryn ıelendi.