Týǵan jerinde Hadısha Bókeevanyń músini ashyldy
ORAL. QazAqparat - KSRO jáne Qazaqstannyń halyq ártisi, Memlekettik syılyqtyń laýreaty Hadısha Bókeevanyń (1917 - 2011) 100 jyldyǵyna arnalǵan sharalar aıasynda týǵan jeri Qaztalov aýdany ortalyǵynda ataqty aktrısanyń músini ashyldy, dep habarlaıdy «QazAqparat» tilshisi.
Aýdandyq mádenıet úıiniń aldynda ornatylǵan músinniń ashylý rásiminde aýdan ákimi Nurlan Bekqaıyr, belgili akter, Qazaqstannyń halyq ártisi Quman Tastanbekov munyń sahna sańlaǵyna kórsetilgen qurmet ekendigin, onyń esimin máńgi este qaldyrý baǵytyndaǵy sharalardyń jalǵasyn tabatynyn jetkizdi.
Bıiktigi úsh metrge jýyq músindi jazýshy Sara Latıeva men oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynov ashyp, gúl shoqtary qoıyldy.
Aýdandyq mádenıet úıinde arnaıy kórmemen tanysyp, derekti fılmdi tamashalaǵan jurtshylyq sodan keıin ólketanýshy Jaısań Aqbaı, eńbek ardageri Mulhaıdar Ámireev, osy toıǵa arnaıy kelgen óner qaıratkerleri Quman Tastanbekov, Merýert Ótekesheva, «Hadısha Bókeeva» atty kitaptyń avtory Sara Latıevanyń estelikterine qulaq túrdi.
«Ómirin ónerimen órnektegen» atty teatrlandyrylǵan qoıylym barysynda jergilikti mádenıet salasynyń qyzmetkerleri Hadısha Bókeeva somdaǵan rólderdi sahnaǵa alyp shyqsa, Batys Qazaqstan oblysynyń túlegi, «Astana opera» memlekettik opera jáne balet teatrynyń solısi Aızada Qaponova, Ǵ.Qurmanǵalıev atyndaǵy oblystyq fılarmonııa ánshileri Aqmaral Ahmetova, Aıbar Haıyrhanov, Nurjan Tasbolatov, Albert Ǵazızjanov, Ernar Ómiráli áýezdi ánderimen kópshilik kóńilin kótere tústi.
Hadısha Bókeevanyń 100 jyldyǵyna arnalǵan mádenı sharalar búgin at báıgesi, kúres, kókpar, qyz qýý, aýdaryspaq syndy ulttyq sport oıyndarymen túıindeldi.
