Týǵan jerimniń tarıhyn jaqsy bilemin – Vladımır Chepel
«Aýyldy jerde qazaq tilin bári biledi jáne til deńgeıine baılanysty eshqandaı másele joq. Al qalaǵa kelseń, munda másele bar ekenin kóresiń. Qalada jastar qazaqsha sóılespeıdi. Memlekettik tildi bilmeıtin azamattardy aýylǵa jiberý kerek. Tájirıbe almasyp, ári sondaǵy ata-apalarymyzdan qazaqsha sóıleýdi úırenip qaıtar edi. Bul máseleni biz etno-aýyl formatynda pysyqtaı alamyz. ıAǵnı, týrızmniń osy formatynyń salasy arqyly memlekettik tildi oqytý múmkindigi bar. Qazir QHA janynan memlekettik tildi oqytý boıynsha kóptegen tegin ortalyqtar ashyldy. Azamattarǵa eń bastysy sóıleı bastaýǵa uıalýdy toqtatý kerek»,– deıdi Vladımır Chepel.
Sonymen qatar, ol Elbasynyń tóraǵalyǵymen ótken keńeste kóterilgen máselelerge toqtaldy.
«Keńes otyrysynda memlekettik tildi oqytý, azamattardyń Qazaqstan Respýblıkasynan basqa memleketterge qonys aýdarý máselesi qozǵaldy. Meniń oıymsha, Qazaqstanda turatyn árbir azamat memlekettik tildi bilýge mindetti. Memleket basshysy Qasym-Jomart Toqaev qoǵamdyq kelisimdi saqtap, tatýlyǵymyzdy arttyrýda memlekettik tildiń róline aıryqsha mán berý qajettigin aıtqan bolatyn. Osy tusta etnosaralyq birlikti saqtaýda memlekettik tildi bilý úlken ról atqarady dep oılaımyn»,– deıdi ol.
Qazaq tilin jetik meńgergen memlekettik qyzmetker jumysta tek qazaq tilinde sóıleıtinin aıtty.
«Men – memlekettik qyzmetshimin. Altyn besigimiz aýylda turǵandyqtan, ártúrli suraqtarmen kelgen qandastarymyzdyń máselesin eshbir qıyndyqsyz túsinip, birden kómektesýge tyrysamyn. Qazaq tilin bilgendikten, ashyq-jarqyn áńgimelesip, erkin pikir almasamyz. Kindik qanym tamǵan týǵan jerimniń ár tóbesin, eldiń salt-dástúrin, tarıhyn jaqsy bilemin. Keıbir tıiskisi kelip turatyn buzyqtaý jigitterge «Baýyrym, tynyshtyq pa?»,– dep jaýap bersem, olar birden óz raılarynan qaıtyp qalady»,– deıdi Vladımır.
Vladımır Chepel qazaqstandyqtardy tatýlyqty baǵalaýǵa shaqyrdy.
«Keńeste men ózim úshin jańa nárse taptym. Bizdiń azamattar úshin erteńgi kúnge degen senim. Biz qalyptasýdyń úlken jolynan óttik. Alda jańa maqsattar men mindetter tur. Osy sátti paıdalanyp, barlyq zamandastarymdy, búkil Otandastarymyzdy tatýlyǵymyzdy baǵalaýǵa jáne birigip jumys atqarýǵa shaqyramyn»,– dep qortyndylady memlekettik qyzmetker.
