«Týǵan jerim - altyn besigim» baıqaýynyń jeńimpazdary anyqtaldy
Vıdeobaıqaýǵa elimizdiń barlyq aımaqtarynan 50-den astam jumys qatysty. 3 mınýttyq beınerolıkte qatysýshylar týǵan ólkesiniń sulýlyǵyn tolyq kórsetýmen qatar, áleýmettik jelidegi ár jazylýshynyń qyzyǵýshylyǵyn týǵyzýǵa tyrysty. Ádilqazy alqasy baıqaý qorytyndysy boıynsha eń úzdik 3 jumysty tańdady.
Osylaısha, daýystardy sanaý boıynsha júlde qory 900 myń teńgeni quraıtyn І oryndy Kókshetaý qalasynyń turǵyny Igor Streltsov ıelendi. Ol óziniń shaǵyn beınesıýjetinde Býrabaı tabıǵatynyń erekshelikteri men sulýlyǵyn kórsetti. ІІ orynǵa (600 myń teńge) Pavlodar oblysynan qatysqan Aıbek Maratov ıe boldy. Týǵan ólkesi Baıanaýyldyń tabıǵatyna degen mahabatymen ol óz jazylýshylaryn beı-jaı qaldyrmady. Júldeli 3 oryndy (500 myń teńge) elimizdegi kóne qalalardyń biri - Túrkistannyń kórikti jerlerin kórsetken Oljas Áljanov qanjyǵaǵa baılady.
«Meniń oıymsha, bul baıqaýdy uıymdastyrý Qazaqstannyń ishki týrızmin damytýǵa yqpal etip qana qoımaı, elimizdiń árbir turǵynyna týǵan ólkesiniń tabıǵaty týraly aıtýǵa múmkindik berdi»,- dep atap ótti baıqaý jeńimpazy Igor Streltsov.
Eske salsaq, buǵan deıin «Qazkontent» AQ uıymdastyrǵan atalǵan týrıstik baıqaýdyń bastalǵany týraly habarlaǵan bolatynbyz.