Týǵan jerge taǵzym: 48 úı ǵana qalǵan aýyl turǵyndary ortaq iske 8,5 mln teńge jınady

NUR-SULTAN. QazAqparat – Shyǵys Qazaqstannyń shekarasynda jatqan Katonqaraǵaı aýdanyndaǵy Qabyrǵa aýylynyń turǵyndary týǵan mekenin damytýǵa óz kúshterimen kirisip ketti, dep habarlaıdy QazAqparat tilshisi.

Shyǵys Qazaqstan oblysynyń Katonqaraǵaı aýdanynda Qabyrǵa atty aýyl bar. El táýelsizdik alyp, keńsharlar ydyraǵan kezde 80-nen astam úıi bar, malǵa baı aýyldardyń biri bolǵan. Shekaralyq aýdannyń halqy túp qotarylyp, qalaǵa kóshken kezde bul jerden de ondaǵan úı solardyń izinen ergen eken. Qazir bar-joǵy 48 úı, 180 adam qalǵan. Eki jyl buryn osy aýyldy BAQ-ta «keleshegi joq» aýyl retinde kórsetkeni Qabyrǵadan túlep ushqan biraz azamattyń namysyna tıse kerek. Bir toby bas qosyp, jurtta qalǵan aýyldastarynyń eńsesin óz kúshterimen kóterý kerek degen sheshimge keledi.

Sol ýádede turǵan bastamashyl top Qabyrǵadan túlep ushqan kózi tiri azamattardyń bárine qolqa salyp, ortaq shotqa 8,5 mln teńgeden astam qarajat jınapty. Bul qarajat aýyldyń ıgiligine jumsalmaq. Mysaly, osy joly kire beriske eńseli arka ornatylyp, beıitteri qorshalǵan.

«Byltyr bizdiń aýylǵa bir top jýrnalıst kelip, telearnaǵa túsirdi. Sonda bizdiń aýyl keleshegi joq eldi mekender tizimine jatqyzylǵany týraly aıtty. Buǵan halqymyz namystanyp, óz kúshterimen jumys isteýge kiristi. Basynda ártúrli oılar aıtyldy. Mysaly, meshit salý kerek pe degen suraq turdy. Biraq, ózderińiz biletindeı, qazir osy Katonqaraǵaı aýdanyndaǵy aýyldarda salynǵan meshitter bos tur. Sondyqtan basqa is bastaýdy jón kórdik. Aldymen aýyldyń aınasy – arka turǵyzyp, zıratty qorshaýdy oıladyq. Myna arkany jasatýdan bastap osy daıyn qalpyna deıingi aralyqta tórt mıllıon teńge qarajat ketti. Arka túnde janyp turady. Elektr jelisi aýyl kóshesiniń shamyna qosylǵan. Úlken joldyń boıyna ornatýǵa «QazAvtoJoldyń» ruqsaty alynyp, arnaıy standartpen jasaldy. Bul jumysqa bas-aıaǵy bir jarym aıdyń ishinde segiz jarym mıllıon teńge jınaldy. Onyń syrtynda bireýi taı, ekinshisi qoı berdi. Oqýshy balalarǵa deıin 10 myń teńgeden qosty. Biz tanymaıtyn, buryn kóship ketken adamdardyń balalary da aqsha jiberip jatty.

Qosylǵandardyń aldy 500 myń teńge berdi. Osy oraıda eń birinshi ortaǵa ıdeıa tastap, aqshasyn salǵan Rýslan degen azamatymyz ekenin erekshe aıta keteıin. Sporttyq is-sharalardy, naqty aıtsaq, báıge men voleıboldy da sol jigit uıymdastyrýǵa bas bolyp otyr. Munyń bári el namysynyń qaıralýynan atqarylyp jatqan jumys. WhatsApp-ta ashylǵan topta aýylǵa jylyna bir shara ótkizip turýǵa maquldastyq. Kelesi jyly balalar oıyn alańyn salýdy josparlap otyrmyz», - deıdi «Týǵan jerge taǵzym» aktsııasyn uıymdastyrýshylardyń biri, aýyl turǵyny Ázız Merǵazın.