Týǵan jerdiń berekesi: jambyldyq fermerlerdiń tirshiligi qalaı jandanyp jatyr

Aq halattan sharýa qojalyǵyna deıin

Jýaly aýdanyndaǵy Darhan Stanbekov úshin jaz – qysqa daıyndyqtyń qyzǵan shaǵy. Shóp shabý, egin jınaý, mal azyǵyn ázirleý – kúndelikti jumysy. Al tól alý naýqanynda maldy táýlik boıy baqylaýǵa týra keledi.

Búginde sharýa qojalyǵyn basqaryp júrgen Darhannyń alǵashqy mamandyǵy medıtsına salasymen baılanysty. Ol 2004 jyly S.Asfendııarov atyndaǵy Qazaq ulttyq medıtsına ýnıversıtetine túsip, bes jyldan keıin «Emdeý isi» mamandyǵyn támamdady. Odan soń eki jyl jedel járdemde feldsher bolyp jumys istep, Qazaq-Reseı medıtsına ýnıversıtetinde terapııa boıynsha ınternatýradan ótti. Keıin qoǵamdyq densaýlyq saqtaý salasynda magıstr dárejesin aldy.

2015 jyly ftızıatr bolyp eńbek jolyn jalǵastyrǵan keıipkerimiz eki jyldan keıin kásibin ózgertti. Ol «Janasyl» sharýa qojalyǵyn basqaryp, eginshilik pen mal sharýashylyǵyna den qoıdy.

Sharýashylyqqa kelgennen keıin alty jyl ótken soń asyl tuqymdy qoı ósirýdi qolǵa aldy. Bul baǵyttaǵy eńbegi kórmelerde de baǵalanǵan. Máselen, qojalyq Merki aýdanynda ótken oblystyq kórmede birinshi oryn aldy.

Ótken jyly sharýashylyq taǵy eki kórmede júldege ıe boldy. Túrkistandaǵy halyqaralyq kórmede qoshqarlary óz sanattary boıynsha birinshi jáne úshinshi oryn alsa, Qordaı aýdanyndaǵy respýblıkalyq kórmede ekinshi jáne úshinshi oryndarǵa qol jetkizdi.

Sharýashylyqtyń jumysynan bólek, Darhan aýyldyń qoǵamdyq ómirine de belsene aralasyp, qaıyrymdylyq sharalaryna turaqty qatysyp keledi.

Eńbekpen ósken kásip, óleńmen órilgen ómir

Shý aýdanyndaǵy Aqsý aýyly – Ashat Aıtqojaevtyń balalyq shaǵy ótken jer ǵana emes, kásibiniń de bastaýy. Bala kezinen mal sharýashylyǵyna aralasqan ol keıin týǵan aýylynda otbasyn quryp, jeke sharýashylyǵyn damytty.

J.Balasaǵun atyndaǵy mektepti bitirgen soń Ashat Tarazda bilim alyp, ekonomıst mamandyǵyn meńgerdi. Degenmen kásibin ózi jaqsy biletin aýyl sharýashylyǵy salasynda bastaýdy jón kórdi.

Onyń kásipkerlik joly 2013 jyly arnaıy baǵdarlama arqyly MTZ-80 traktoryn satyp alýdan bastaldy. Keıin sharýashylyqqa basqa da tehnıka qosylyp, jumys aýqymy keńeıdi. Qazir onyń qojalyǵynda «Vektor» kombaıny, traktorlar, shóp presteıtin mashınalar, KamAZ ben ZIL júk kólikteri bar. Munda dándi daqyldar men kópjyldyq shópter ósirilip, mal sharýashylyǵy da qatar damyp keledi.

Eki mal bazasy bar qojalyqta júzge jýyq sıyr, 400 qoı jáne jylqy ustalady. Buǵan qosa 50 buqa bordaqylanyp jatyr. Ashat asyl tuqymdy sıyr ósirýdi de qolǵa alǵan.

Alǵashqy traktoryn satyp alǵan 2013 jyl Ashattyń jeke ómirinde de mańyzdy kezeń boldy. Ol sol jyly otbasyn qurdy. Búginde jubaıymen birge bes bala tárbıelep otyr.

Fermer sharýashylyq jumystarymen qatar aýyldastaryna kómektesýge de ýaqyt tabady. Qaıyrymdylyqty ómirlik ustanymynyń biri sanap, bul kózqarasyn Abaıdyń «Adamzattyń bárin súı, baýyrym dep» degen óleń joldarymen baılanystyrady.

– Adaldyq, shynshyldyq, tabandylyq pen jaýapkershilik adamǵa ıgi is jasap, aınalasyna paıdasyn tıgizýge kómektesedi. Adal eńbektiń jemisi árdaıym tátti. Eńbek bereke men molshylyqqa, órkendeýge jol ashady, – dedi fermer.

Aýyl sharýashylyǵynyń tynymsyz tirshiligine qaramastan, Ashat rýhanı dúnıesine de kóńil bóledi. Bos ýaqytynda dombyra tartyp, óleń jazýǵa áýes.

Bishkekten týǵan aýylyna oralǵan fermer

Ashat sekildi Aıvas Hazıevtiń de kásibi týǵan aýylymen tyǵyz baılanysty. Qordaı aýdanyndaǵy Qaınarda týyp-ósken ol jeti balanyń kenjesi. Jastaıynan jer óńdep, mal baǵýǵa aralasqan Aıvas V.Maıakovskıı atyndaǵy №32 mektepti bitirgen soń aýyl sharýashylyǵy salasynda bilim alýdy uıǵarǵan. 2004 jyly Qyrǵyzstandaǵy agrarlyq ýnıversıtetke túsip, tórt jyldan keıin agronom mamandyǵyn alyp, týǵan aýylyna oraldy.

Qaınarǵa kelgen soń «Ibragım Habıb» sharýa qojalyǵyn quryp, jumysyn 50 gektarǵa jýyq jerden bastady. Alǵashynda jońyshqa men dándi daqyldar ósirip, mal sharýashylyǵymen aınalysty. Ýaqyt óte sharýashylyqtyń jer kólemi 600 gektarǵa jetti. Onyń 50 gektary – sýarmaly, 300 gektary – tálimdik jer, al 250 gektary jaıylymǵa arnalǵan.

Sharýashylyqty keńeıtýmen qatar tehnıkasyn da jańartyp keledi. Jýyrda lızıng arqyly YTO traktoryn satyp aldy. Búginde qojalyǵynda segiz jylqy, 30 sıyr jáne 790 bas edilbaı tuqymdy qoı bar. Agronom mamandyǵyn meńgergenine qaramastan, qazir onyń kásibindegi negizgi baǵyt – qoı sharýashylyǵy.

Qaınar – Aıvas úshin kásibin órkendetken meken ǵana emes, otbasyn qurǵan jeri. Ol 2011 jyly osynda shańyraq kóterip, búginde kópbalaly áke atanyp otyr.

– Abaı aıtqandaı, «Adal eńbekpen kún kórý – arly adamnyń isi». Adamzat ejelden óz qajettiligin eńbek arqyly ótep keledi. Eńbek adaldyqqa, tabandylyq pen jaýapkershilikke baýlyp, maqsatqa jetýge jáne qoǵamǵa paıda keltirýge kómektesedi, – dedi Aıvas.

Úsh fermerdiń ómir joly ártúrli bolǵanymen, olardyń tańdaýy týǵan jermen jáne aýyl sharýashylyǵymen baılanysty.

Buǵan deıin aýyl áıelderiniń kásip bastaýǵa nege qınalatynyn jazǵan edik.