«Týǵan jerdi» jershildikke ıterý dep qabyldamaý qajet - Máýlen Áshimbaev

ASTANA. QazAqparat - «Nur Otan» partııasy Tóraǵasynyń birinshi orynbasary Máýlen Áshimbaev rýxanı jańǵyrýǵa arnalǵan jobalardyń mán-maǵynasyn túsindirdi. Osy oraıda ol «Týǵan jer» jobasy aıasynda jershildikke jol bermeý qajettigin erekshe atap ótti, dep xabarlaıdy QazAqparat tilshisi.

«Týǵan jer» baǵdarlamasy aıasynda biraz metsenattar ózderiniń shyqqan jerlerine kómekterin berip jatyr. Nysandardyń salynýyna bastamashy bolýda. Ótken jyly osyndaı maqsattarǵa metsenattardyń tarapynan 51 mıllıard teńge bólindi degen aqparat bar. Bul da úlken kómek ekeni sózsiz. Biraq óziniń týǵan jerińe kómek berýdi jershilikdikke ıterý dep qabyldaýǵa bolmaıdy. Bárimiz - bir eldiń azamatymyz. Qazaqstan - ortaq Otanymyz. Mysaly, qazaq jastary ońtústikte týyp-ósip, soltústikke baryp, jumys isteımin, sol jerde turamyn dese, jol ashyq. Oǵan barlyq múmkindikter jasalady», - dedi M.Áshimbaev «Jas Otan» jastar qanatynyń IV seziniń «Rýxanı jańǵyrý» sessııasynda.

Onyń aıtýynsha, «Týǵan jer» baǵdarlamasynyń negizgi maqsaty - týǵan jerińe kómek berý arqyly búkil Qazaqstannyń damýyna úles qosý.

«Endi, bárimiz de - Qazaqstan azamatymyz. Otanymyz da bir, jerimiz de bir. Degenmen, árbir adamnyń óziniń týǵan jeri bar. Sol jerdiń tarıxyn, folkloryn, taý-tasyn, ańyz-áńgimelerin bilý kerek. Osylaısha, ózimizdiń ólketanýymyzǵa úles qosa alamyz», - dep atap kórsetti M.Áshimbaev.

Partııa Tóraǵasynyń birinshi orynbasary rýxanı jańǵyrýdyń basty maqsatyna da toqtaldy. Onyń aıtýynsha, xalyqtyń rýxanı sanasyn jańǵyrtýda eki mańyzdy máseleni eskerý kerek.

«Bir jaǵynan biz álemde jasalyp jatqan jańalyqtarǵa úırenýimiz kerek. Ekinshi jaǵynan ózimizdiń ulttyq kodymyzdy, ulttyq bolmysymyzdy saqtap, jahandyq dúnıede joq bolyp ketpeı, óz ornymyzdy alýymyz qajet. Sóıtip, Qazaqstandy álemge tanytyp, damyǵan memleketterdiń qataryna qosylýymyz kerek», - deıdi M.Áshimbaev.