Týǵan jerdi túletý - paryz - Nurlybaı Joldybaıuly

ORAL. QazAqparat - Elbasymyzdyń «Bolashaqqa baǵdar: rýhanı jańǵyrý» maqalasynda aıtylǵanyndaı, týǵan jerimizge týymyzdy tigip, ony túletý - ortaq paryzymyz. Bul týraly týǵan jeri Qaztalov aýdany Saryqudyq aýylyna medpýnkt salyp bergen jergilikti kásipker Nurlybaı Joldybaıuly málim etti, dep habarlaıdy «QazAqparat» tilshisi.

Jýyrda qyryq jasqa tolǵan Nurlybaıdyń aıtýynsha, Oral qalasynda da tirshilik etip kórgen. 1999 jyldan bastap shólmek jınap, tapsyrýmen aınalysqan ol 2007 jyly birjola aýylǵa bet burdy. Týǵan jerge degen saǵynysh qoıa ma ári ata-anasy Joldybaı men Ǵazızanyń tuńǵyshy bolǵandyqtan, elge kelip, inileri Abylaı, Rýslan, Mardanmen birge bas biriktirip, qojalyq ashyp, tórt túlik mal ósirýdi jón kórdi. Qazirgi kezde «Darhan» sharýa qojalyǵyndaǵy jalpy mal sany 600-den asady. 15-16 adamdy jumyspen qamtyp otyr. Oǵan qosa jol boıynda «Shahızada» dámhanasy jumys jasaıdy.

Týǵan aýyl dese, júregi eljirep turatyn kásipker Jeńistiń 70 jyldyǵyna oraı Saryqudyq aýylyndaǵy soǵysta qaza tapqan bozdaqtarǵa arnalǵan «Erler esimi el esinde» eskertkishin mármár tas qoıyp, kafeldetip, túgeldeı jańartty. Oǵan qosa ótken jyly medpýnkt saldy. Materıalynyń ózine 5,2 mln. teńge ketse, qurylysshylardy jaldaǵany bar, ishi-syrtyn qaptap, sylaǵany bar, barlyǵy 7-8 mln. teńgege baryp qalady. Kúni búgin medpýnkt aýyl turǵyndaryna qyzmet etýde, feldsherlik jáne akýsherlik kabınet, ekpe bólmesi jańa apparattarmen qamtamasyz etilgen, naýqastar kúndizgi statsıonarda da em alady.

Atap óter jaıt, kásipker medpýnkt ǵımaratyn memleket ıeligine tolyqtaı berdi.

«Mundaǵy maqsatym - týǵan aýylymnyń kórkeıýine óz úlesimdi qosý. Sońǵy jyldary Saryqudyqqa qatqyl tabandy jol jetti, endi aýyz sý, gaz keledi dep jatyr. Taǵy bir armanym - aýylda jańadan mektep salynsa deımin. Osylaısha tolyq jaǵdaı jasalsa, týǵan jerinen turǵyndar, ásirese, jastar kóshpeı, turaqtap qalar edi. Buǵan biz sekildi kásipkerler, el azamattary qolushyn sozyp, úlgi kórsetip, yqpal etýi tıis dep oılaımyn», dedi «QazAqparat» tilshisine Nurlybaı Joldybaıuly.