Týǵan jer: BQO-da jańa kópir paıdalanýǵa berildi

  ORAL. QazAqparat - Búgin Batys Qazaqstan oblysynda jańa kópir paıdalanýǵa berildi, dep habarlaıdy QazAqparat tilshisi.

Elbasynyń «Bolashaqqa baǵdar: rýhanı jańǵyrý» maqalasyna sáıkes «Týǵan jer» baǵdarlamasy aıasynda Shyńǵyrlaý aýdany Belogor aýyly mańynda jańadan salynǵan kópir ashyldy.

Bul kópirdiń ornynda buryn topyraq úıindisi ǵana bolǵan. Kóktemde Shyńǵyrlaý ózeni tasyǵan kezde ol shaıylyp ketip, osy mańdaǵy aýyldar turǵyndary qatynassyz qalatyn.

Memleket basshysynyń árkimniń týǵan jerine kómektesýi qajettigi jónindegi bastamasyna ún qosqan Shyńǵyrlaý aýylynda turatyn óńirge tanymal eńbek ardageri, aýdannyń qurmetti azamaty Alǵalı men onyń uly Mırbolat Tasmaǵambetovter kópir máselesin sheshýge atsalysty. Sóıtip 7 mln teńgege jańa kópir salyndy. 

Belogordaǵy kópirdiń ashylý rásimine qatysqan oblys ákiminiń orynbasary  Ǵabıdolla Ospanqulov «Rýhanı jańǵyrý» baǵdarlamasy aıasynda óńirde túrli jobalar júzege asqanyn jetkizdi. Bul qarjynyń bir bóligi bıýdjet esebinen qaralsa, qalǵanyn metsenattar bóldi. Mundaı jumystar bıyl da jalǵasatyn bolady.