«Týǵan jer» baǵdarlamasyn qarjylandyrý kólemi 40 paıyzǵa azaıyp ketken
«Týǵan jer» jobasy aıasynda 2019 jyly 14 myńnan astam is-shara ótkizildi. 4 mıllıonnan astam adam qamtyldy. 2019 jyly metsenattar esebinen 1 myńnan asa áleýmettik mańyzy bar nysan salyndy, 700-den astam nysan kúrdeli jóndeýden ótkizilip, aýyldar men qalalardy damytýǵa baǵyttalǵan jobalar iske asyryldy. Qarjylandyrý kólemi 60 mlrd teńgeden asty», - dedi ol Aqordada ótken jıynda.
Nurlan Saýranbaev óz sózin naqty mysaldarmen atap ótti. Onyń aıtýynsha, Aqmola oblysynda metsenattar balalarǵa arnalǵan alańdar salyp, mýzeılerdi jóndep, kópbalaly jáne tabysy az otbasylarǵa kómek kórsetken. Al Qostanaı oblysynda metsenattar jastardyń, onyń ishinde aýyl jastarynyń básekege qabilettigin arttyrýǵa úles qosyp, 2019 jyldyń qyrkúıeginde mektepke 13,5 mln teńgege kompıýterlik tehnıka satyp alyp bergen. Sol sekildi BQO-da «Bolashaqqa joldama» jobasy iske asyrylýda. Onyń sheńberinde óńir kásipkerleri daryndy jastardyń bilim alýyna kómek kórsetedi.
Dese de, bólim meńgerýshisi «Týǵan jer» baǵdarlamasy boıynsha problemalardyń baryn da jasyrǵan joq.
«Atap aıtqanda, 2018 jylǵa qaraǵanda joba boıynsha qarjylandyrý deńgeıi 40 paıyzǵa azaıyp qaldy. Onyń bir sebebi – óńirlerde jobalardy tirkeý esebi sapaly túrde júrgizile bastady. Sonymen qatar óńirlerde metsenattardyń qarjy bólý boıynsha 2019 jylǵy kórsetkishterin salystyratyn bolsaq, eń kóbi - Mańǵystaý oblysynda (14 mlrd teńge). Sol sekildi Atyraý óńirinde metsenattar 7 mlrd teńge qarajat bólgen. Qarjylandyrýdyń mundaı kólemi birqatar óńirdiń bıznestiń óz qajettiligi úshin salynǵan nysandaryn, bıznestiń áleýmettik jaýapkershiligi boıynsha sheteldik kompanııalar salǵan nemese MJÁ aıasynda boı kótergen nysandardyń tizimge kirgizilýimen túsindiriledi», - dedi ol.
Nurlan Saýranbaev Mańǵystaý oblysynda Dostyq úıiniń salynǵanyn úlgi etti.
«Mundaı mysaldar basqa aımaqtarda da kezdesedi. Usynylǵan málimetterdi taldaý jumystary kórsetkendeı, aımaqtarda bul baǵyttaǵy jumystardyń joǵary dısproportsııasy baıqalady. Máselen, SQO bul baǵytta 510 myń adamnyń jumyldyrylýymen 1155 sharanyń ótkeni jaıly esep beredi. Al onda halyqtyń sany 549 myń adam ǵana. Al Pavlodar oblysynda 100 myń adamnyń qamtylýymen 372 shara uıymdastyrylǵan. Jalpy, «Týǵan jer» jobasy boıynsha sharalar legi 100-den (Nur-Sultan qalasy men Qaraǵandy oblysy) 2 myńǵa deıingi (Aqmola, Qostanaı, Túrkistan oblystary) aralyqta uıymdastyrylǵan», - dedi ol.
Eske sala ketsek, Memlekettik hatshy Qyrymbek Kósherbaevtyń tóraǵalymen Aqordada búgin QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komıssııanyń otyrysy ótti .
