«Týǵan elge saıahat» balalar ekskýrsııalyq poıyzy jolǵa shyǵady
ASTANA. KAZINFORM — «Týǵan elge saıahat» balalar ekskýrsııalyq poıyzy jolǵa shyǵady. Bul týraly Týrızm jáne sport mınıstrliginen málim etti.
«2016 jyldan bastap Samruk-Kazyna Trust áleýmettik jobalardy damytý qorynyń qoldaýymen „Týǵan elge saıahat“ balalar ekskýrsııalyq poıyzy jobasy iske asyp jatyr. Bul joba osy kúnge deıin 2 320 balany qamtydy», — dep atap ótti mınıstrlikten agenttiktiń resmı saýalyna oraı.
Vedomstvo usynǵan anyqtamalyq derekke sáıkes, «Týǵan elge saıahat» — patrıottyq joba.
Onyń aıasynda balalar poıyzben saıahattaı otyryp, Qazaqstan qalalaryndaǵy tarıhı eskertkishtermen, kórikti jerlermen tanysady.
Joba «Samuryq-Qazyna» AQ Qaıyrymdylyq jobalarynyń halyqaralyq forýmynda korporatıvtik qaıyrymdylyq aıasynda úzdik dep tanyldy.
Ol jyl saıyn iske asady. Tek 2020-2021 jyldary koronavırýs pandemııasyna baılanysty jolǵa shyqqan joq.
«Týǵan elge saıahat» jazǵy tanymdyq-týrıstik poıyzynyń birinshi reısi 27 maýsymda jolǵa shyǵady. 12 kún boıy balalar Astana, Býrabaı, Almaty, Taraz, Túrkistan jáne Baıqońyr qalalaryndaǵy tanymal mádenı-tarıhı oryndardy aralaıdy. Ekskýrsııadan basqa jol boıy oqýshylarmen birge tálimgerler men pedagogtar jumys isteıdi. Qyzyǵýshylyq úıirmeleri, zııatkerlik jáne sporttyq oıyndar men basqa da oıyn-saýyqtar qarastyrylǵan. Ekinshi reıs osy jylǵy 24 shildege josparlanǵan. «Samruk-Kazyna Trust» qory qoldaıtyn áleýmettik joba eki maýsymda ótedi. OGlardyń árqaısysyna kópbalaly, az qamtylǵan nemese tolyq emes otbasylardan shyqqan 10-15 jastaǵy 200 bala qatysady. Sý tasqynynan zardap shekken óńirlerdiń balalaryna basymdyq beriledi», — dedi mınıstrlikten.
