Rámizge degen qurmet: Aýyl turǵyny óz aýlasyna tý tikti
TÚRKІSTAN. KAZINFORM – Túrkistan oblysy Maqtaaral aýdany Haıdar Týgýshev aýylynyń turǵyny Shokır Babaev óz aýlasynda Memlekettik týdy jelbiretip qoıdy. Otbasy ár merekede kók Týdy kókke kóteredi.
Shokır Babaevtyń otbasy jylda ul-qyzdary men nemerelerimen birge merekeni erekshe qarsy alady. Bul - memlekettik rámizderge degen qurmet pen Otanǵa degen súıispenshilik ekenin aıtady.
– Memlekettik týdy ornatyp, mynaý óskeleń urpaqtyń patrıottyq sezimin oıatý úshin, nemerelerimizdi, bala-shaǵamyzdy otansúıgishtikke tárbıeleıik degen nıetpen QR Memlekettik týyn kóterip, Ánurandy shyrqap, memlekettik rámizderge degen qurmetimizdi bildiremiz, - deıdi Shokır Babaev.
Tý tuǵyrynyń bıiktigi – 10 metr. Jalaýdyń eni – 1 metr, uzyndyǵy – 2 metr. Tájik ultynyń ókili bul rásimdi ulttyq birlik pen tatýlyq sımvolyna balaıdy.
– Maqtaral aýdanynda turatyn tájik etno-mádenı birlestiginiń ókilderi memlekettik rámizderdi qurmettep, memlekettik tilde bilim alyp, memlekettik tildegi balabaqshalarǵa baryp, qazaq halqymen bir shańyraq astynda tatý tátti ómir súrip jatyr, - deıdi ol.
QR Rámizderi kúni barsha qazaqstandyqt rasmı merekemen quttyqtap, el aman, jurt tynysh bolsyn degen tilegin de bildirdi.
Eske salaıyq, búgin QR Memlekettik rámizder kúni toılanady. Qazaqstannyń tuńǵysh rámizderi – Tý men Eltańba 1992 jyldyń 4 maýsymynda qabyldandy. Al Ánuran mátini sol jyldyń 11 jeltoqsanynda bekitildi. Keıin 2006 jyldyń 6 qańtarynda qaıta ózgertildi.
Al Qazaqstan rámizderin qorlaǵandarǵa qandaı jaza qoldanylady? Agenttik tilshisi rámizder kúninde osy saýalǵa jaýap izdep kórdi.