Týdy ustaǵanda tebirenip ketemin – túrkistandyq polıtseı

TÚRKІSTAN. QazAqparat – Túrkistan qalasynyń turǵyny, polıtsııa maıory Bekzat Haırıev saptyq sharalar men sherýlerde Memlekettik týdy ustap júredi. Oblystyq polıtsııa departamentinde aǵa ınspektor qyzmetin atqaratyn ol 12 jyldan beri ózine júktelgen osy mindetti zor abyroı sanaıdy, dep habarlaıdy QazAqparat tilshisi.

«Memlekettik týdy alyp júrý - zor abyroı dep bilemin. QR Qarýly kúshteri kúni, 23 maýsym - polıtsııa qyzmetkerleriniń tól merekesinde, Jeńis meıramy jáne ózgede ataýly kúnderi ótetin is-sharalardaǵy sherýlerde Memlekettik týdy ustap shyǵamyn. Qobaljý bolady. Sebebi, men qatelessem, meniń qasymdaǵy eki áriptesim jańylysýy múmkin. Bul búkil saptyń buzylýyna ákelip soǵady. Sondyqtan, árbir basqan qadamymyzdy eseptep júremiz», - deıdi ol.

Bekzat Haırıev ózine júktelgen árbir iske jaýapkershilikpen qaraıdy. Tapsyrmalardy tııanaqty oryndap, talaı márte basshylyq tarapynan marapattarǵa ıe bolǵan. Sondyqtan da bolar, Memlekettik týdy alyp júrýge laıyqty azamat retinde tańdalypty. Buǵan onyń bolmysy da, bitimi de saı: salmaǵy - 85 keli, boıy – 1,85 m.

«Týdy ustaǵanda tebirenip ketemin. Boıymdy maqtanysh kernep, basymdy bıik ustaımyn. Maǵan osyndaı múmkindik berip, joǵary jaýapkershilikti senip tapsyrǵan basshylyq quramǵa alǵysym sheksiz», - deıdi ol.

Bekzat Sultanmuratuly Túrkistan qalasynda týyp-ósken. Qoja-Ahmet ıAsaýı atyndaǵy HQTÝ-da «Quqyqtaný» mamandyǵyn meńgeripti. Al, eńbek jolyn qaladaǵy ýaqytsha ustaý ızolıatorynda bastaǵan. Keıinnen ýchaskelik polıtsııa ınspektory boldy. Al, búginde Túrkistan oblystyq polıtsııa departamentinde aǵa ınspektor qyzmetin atqaryp júr.

Eske salsaq, bıyl memlekettik rámizderge 30 jyl: Qazaqstanda tý, eltańba jáne ánuran qalaı qorǵalady?