Týdy qorlaıtyn áreketterge tıym salatyn ýaqyt jetti - B. Tileýhan
ASTANA. 22 jeltoqsan. QazAqparat /Qanat Mámetqazyuly/ - Týdy qorlaıtyn áreketterge tıym salatyn ýaqyt jetti. Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan Bekbolat Tileýhan osylaı málim etti.
«Tý, baıraq - kez kelgen memlekettiń aıbyny, eldiginiń belgisi, táýelsizdigimizdiń beınesi bolǵan rámiz. «Týdyń qulaýy, baıraqtyń jyǵylýy» degen sóz el úshin asa aýyr esepteletin qubylys. Eki el soǵysqan kezdegi jeńistiń belgisi - jaýdyń týyn jyǵyp, óziniń týyn tigedi. Óz qansyrap, ólip bara jatsa da týyn jyqpaı tistenip ólgen tarıhta qanshama erler bolǵan. Óstip júrgende soraqylyqtyń kókesi Taldyqorǵanda boldy», - deıdi B. Tileýhan.
Onyń aıtýynsha, Taldyqorǵan qalasynyń ortalyǵynda kóshe tazalaýshylar Jańa jyl qarsańynda Qazaqstannyń qadirli Týynan dorba tigip, qoqys tasýǵa deıin barypty. Budan keıin aqparat quraldaryndaǵy derekterge júgingen depýtat B. Tileýhan álgi áreketti istegen «Jıgýlı» JShS qyzmetkerleri ekendigin, olardyń ortalyq alańdaǵy shyrshany sándeıtin oıynshyqtardy memlekettik Týdan tigilgen qapqa salyp, súırelep júrgenin aıtty. Qyzmetkerler týdyń eskirip qalǵanyn aıtyp baǵypty. «Táýelsiz eldiń baıraǵyn, Kók Týymyzdy dorba qylǵan zymııan áreketterge toqtaý salatyn naqty tetik tabatyn ýaqyt ábden jetti», - dedi Bekbolat Tileýhan.
