«Túbirtekti talap et - júldeni utyp al!» sharasy aıasynda ShQO azamaty kólik utyp aldy (FOTO)
ASTANA. QazAqparat - Astanada «Túbirtekti talap et - júldeni utyp al!» respýblıkalyq sharasy aıasynda Chevrolet kóligi oınatyldy.
Aıta keteıik, «Túbirtekti talap et - júldeni utyp al!» sharasy jyl boıy aýdandyq, oblystyq deńgeılerde ótkizilip kelgen bolatyn. Búgin respýblıkalyq deńgeıde ótken lotereıada óńirlik jeńimpazdar arasynda 100 myń teńge, 200 myń teńge, 300 myń teńge jáne jeńil kólik oınatyldy. Júlde utyp alý úshin, aktsııa erejesi boıynsha azamattarǵa dúkenderde taýar satyp alý kezinde túbirtek talap etp, keıin sol túbirtekterdi arnaıy lotereıaǵa aıyrbastap alý qajet boldy.
Búgin QR Qarjy mınıstrligi Memlekettik kirister komıtetinde ótken aktsııanyń qorytyndy rásiminde Chevrolet kóliginiń ıesi anyqtaldy. Qazaqstanda shyǵarylǵan atalmysh kólikke ShQO turǵyny Álibek Mýsın ıe boldy.
«Jeńimpazdardy taǵy bir ret quttyqtap qoıaıyq! Kelesi jyly da osy aktsııaǵa belsene qatysýǵa shaqyramyn. Túbirtekterdi jınaý arqyly biz sapasyz taýarlardan saqtanyp qana qoımaımyz, sonymen qatar bıýdjet kirisin kóbeıtemiz, kóleńkeli bıznestiń úlesin azaıtamyz. Sáıkesinshe elimizdiń tuǵyry bekip, odan ári damı túsedi», - dedi Memlekettik kirister komıtetiniń basshysy Dáýlet Erǵojın.
Onyń sózine qaraǵanda, kelesi jyldan bastap, atalmysh lotereıanyń formaty ózgerip, jalpyhalyqtyq sıpatqa ıe bolmaq.
«Biz kelesi jyly jańa formatqa kóshemiz. Aktsııanyń uıaly qosymshasyn jasaımyz. «Qazaqtelekom» kompanııasymen ondaı ýaǵdalastyq bar. Sondyqtan barlyqtaryńyzdy atalmysh aktsııaǵa qatysýǵa shaqyramyn», - dedi ol.
Eske sala keteıik, «Túbirtekti talap et - júldeni utyp al!» aktsııasy 2015 jyly 1 sáýirden 30 qarashaǵa deıin ótkizilgen bolatyn.
