Túbirtektegi «ODN»: Kópqabatty úılerde turǵyndardyń aqshasyn qalaı urlaıdy

ASTANA. QazAqparat - Búginde úıdiń jalpy qajettilikterine ketetin elektr energııanyń aqysyn (túbirtekte «ODN - obşedomovye nýjdy» dep kórsetiledi - avt.) barlyq turǵyndar bólip tóleıdi. Alaıda ony durys baqylamasa, ishine tómende ornalasqan saýda oryndarynyń shyǵyndary da kirip ketýi múmkin, dep xabarlaıdy QazAqparat tilshisi.

Astana qalalyq turǵyn úı ınspektsııasy basqarmasynyń basshysy Álıxan Qýatbekovtyń aıtýynsha, úıdiń jalpy qajettilikterine ketetin elektr energııanyń aqysyn baqylaý úshin arnaıy esepteýish quraldary bar. Ony qyzmet kórsetýshi kompanııa ornatýy tıis. Sosyn atalǵan quraldary mindetti túrde kommertsııalyq esepke tapsyrý qajet. «Esepteýish quraldary «Astanaenergosbyt»-qa kommertsııalyq esepke tapsyrylsa, barlyq shyǵyndar durys ári ádil eseptelip, turǵyndar arasynda teń bólinedi. Sondyqtan esepteýish quraldaryn kommertsııalyq esepke tapsyrýdy talap etý kerek. Áıtpese, PIK, ıaǵnı qyzmet kórsetýshi kompanııa jasyryn basqa bir kıoskilerdi, saýda oryndarynyń shyǵyndaryn qosyp jiberýi múmkin. Sol sebepti kommertsııalyq esepke mindetti túrde berý kerek. Sonda urlyq ta bolmaıdy, qosyp jiberý de bolmaıdy. Negizi, (Astanada árbir páter úshin - avt.) 700-1 000 teńge kóp. Degenmen, barlyǵy turǵyn úıdiń ınfraqurylymyna baılanysty. Al, endi, bes qabatty úılerde podezd ben esik aldyndaǵy jaryqtan basqa eshteńe joq qoı. Máselen, kópqabatty úılerde lıftiler, sý aıdaý qondyrǵylary jáne taǵysyn taǵy bar. Bunyń barlyǵy - energııa. «ODN» degen sol», - dedi Á.Qýatbekov QazAqparat tilshisine bergen suxbatynda.

Basqarma basshysynyń sózine qaraǵanda, jalpy qajettilikterine ketetin elektr energııanyń aqysyn bólek tarıf, nemese elektr qýaty úshin keletin tólemniń ishine kirgizýge bolady. Biraq bunyń barlyǵy turǵyndardyń jalpy jınalysynda xattamanyń negizinde sheshilýi tıis.

Aıta keteıik, Astanada kópqabatty úılerde árbir páterge keletin osy tólemaqynyń kólemi 700-1 000 teńgege deıin jetip jatady.