Túbinde qazaq veloshabandozdary «Týr de Fransty» jeńip, Parıjde Qazaqstan baıraǵyn jelbiretedi - A. Vınokýrov
ASTANA. QazAqparat - "Astana" sapynda túbinde "Týr de Fransty" jeńip, Parıjde Qazaqstan baıraǵyn jelbiretetin qazaq veloshabandozy shyǵady. Bul týraly Olımpıada chempıony, "Astana" velokomandasynyń bas menedjeri Aleksandr Vınokýrov Astanada Nazarbaev Ýnıversıteti stýdentterimen kezdesýi barysynda málim etti.
"Men barlyq sheteldik jarystarda Qazaqstan atyn, qazaq Týyn bıik kóterýge tyrystym. 2006 jyldan beri biz ózimizdiń "Astana" velokomandasynyń sapynda óner kórsetýge múmkindik aldyq. Otanymyzdyń Baıraǵy tústes jeıdeni kıgen kezdegi sezim namysyńdy, jigerińdi janı túsedi, uly jeńisterge ıtermeleıdi", - dep bastady sózin A. Vınokýrov. Onyń aıtýynsha, qazirgi ýaqytta talaby men talanty qatar shapqan qazaq jastaryn "Astana" sapyna alý jáne halyqaralyq deńgeıge kóterý máselesi óte mańyzdy qatarǵa qoıylǵan.
"Biz bul baǵytta jumys jasap kelemiz. Jas jigitter ósip keledi. Ol úshin ýaqyt qajet. Bizdiń komandada shyńdalyp júrgen 11 qazaqstandyq veloshabandoz bar. Vınchetso, ıAkob, Mıkele syndy grandtardan tájirıbe jınaqtaýda. Olar qashan bıik jeńisterge qol jetkizetinin dóp basyp aıtý qıyn. Degenmen ondaı kún bolary anyq. Birkúndik jarystarǵa keletin bolsaq, bizde áýesqoılar arasynda álem chempıony atanǵan Lýtsenko bar. Danııa Týrynda onyń alǵashqy jeńisine kýá boldyq. Bul onyń kásibı sporttaǵy alǵashqy jeńisi. Ol ózine sene bastady. Senbi kúni bastalatyn Výelta kópkúndiginde kezeńderdiń birinde jeńiske jetip, bizdi qýantady dep oılap otyrmyz. Sonymen qatar onyń mindeti Rıo-2016 Olımpıadasyna tyńǵylyqty daıyndyqpen barý", - dep atap ótti ol.
A. Vınokýrov kelesi jyly "Astana" komandasyna taǵy eki jas qazaq veloshabandozy alynatynyn da habarlady jáne "Týr de Fransty" baǵyndyratyn qazaqstandyq shabandozdyń shyǵýy ábden múmkin ekendigin de jetkizdi.
"Kelesi jyly bizdiń komandanyń sapyna taǵy eki jas qazaqstandyq veloshabandoz qosylady. Sondyqtan óz ishimizden sportshylardy shyńdaý jumysy jasalýda. Biz kúnderdiń kúninde Týr de Fransty jeńip, Parıjde Italııanyń emes, qazaq Ánuranyn shyrqatatyn qazaq sportshysy shyǵady dep senemiz, osy baǵytta jumys atqaramyz, armanymyz sol", - dep túıdi sózin bas menedjer.
