Túbinde barsha qazaqstandyqtar memlekettik tilge kóshetin bolady - Elbasy Nursultan Nazarbaev
ALMATY. Aqpannyń 3-i. QazAqparat /Erlik Erjanuly/ - Memlekettik tildiń artyqshylyǵyna eshkim talasa almaıdy. Bul týraly QR Prezıdenti búgin Almatyda Prezıdenttik jáne Memlekettik stıpendııalardy tapsyrý rásiminde aıtty,
dep habarlaıdy QazAqparat.
"Táýelsizdik jyldary biz 900 qazaq mektebin ashtyq. Jyl saıyn ashylatyn mekteptiń 70 paıyzy qazaq tilinde bolyp jatyr. Tildi damytýǵa 2005 jyly 150 mıllıon teńge jumsasaq, byltyr 5 mıllıard teńge qarjy jumsaldy. Jalpy baǵyttyń ózi durys kele jatyr dep sanaımyn. Árıne, bunyń bárine ýaqyt kerek, shydamdylyq kerek. Memlekettik tildiń artyqshylyǵyna eshkim talasa almaıdy. Túbinde barsha qazaqstandyqtar osy tilge kóshetin bolady. Ózge órkenıetti elderde tildiń mártebesi qandaı bolsa, bizde de sondaı bolady. Men de orystar, túrikter jáne taǵy basqalar sııaqty bir-aq tilde sóılegim keledi. Biraq, búkil halyq saılaǵan Prezıdent bolǵannan keıin ishki jaǵdaıymyzdy oılamaýǵa bolmaıdy", dedi QR Prezıdenti Nursultan Nazarbaev. Táýelsizdiktiń tuǵyry - eldiń alystaǵy bolashaǵy ekenin tilge tıek etken Elbasy táýelsizdikti nyǵaıtyp, ekonomıkamyzdy kóterip, abyroıymyz kóterile berse basqa másele ózinen-ózi sheshiletinin jetkizdi. Sondaı-aq jas urpaq mektep bitirgende úsh tildi bolsyn dep aıtqan sebebin túsindirdi. Orys tilinen ajyrap ketken Túrikmenstan sııaqty elderdiń orys tiline qaıtadan oralyp jatqanyn, Malaızııanyń táýelsizdik alǵan kezde aǵylshyn tilinen ajyrap óz tilimizde sóıleımiz degenimen 5 jyldan keıin mektepterdi qaıtadan aǵylshyn tiline kóshirgenin aıtty. Sondaı-aq úndi memleketi de aǵylshynnyń bodanynan bosaǵan kezde aǵylshyn tilin alyp tastaımyz dep qaýly qabyldap, alaıda 5 jyldan keıin 1 mıllıard úndi jappaı aǵylshyn tiline qaıtyp kelgenin jáne Sıngapýrde de osyndaı jaǵdaı bolǵanyn eske saldy. Jahandaný kezinde eshbir el bir ǵana tilmen eshqaıda shyǵa almaıtynyn naqty mysaldarmen aıtty.
