Týberkýlezge shaldyqqan sottalýshylar dári-dármektermen 90 paıyzǵa qamtylyp otyr - vıtse-mınıstr
ASTANA. 14 aqpan. QazAqparat - Elimizdegi qylmystyq-atqarý júıesiniń mekemelerinde otyrǵan týberkýlezben aýyratyndar deni saý jazasyn óteýshilerden tolyq oqshaýlanǵan.
Bul týraly búgin Májilistiń Áleýmettik-mádenı damý komıtetiniń keńeıtilgen otyrysynda «Halyq densaýlyǵy jáne densaýlyq saqtaý júıesi týraly» Kodeksiniń iske asyrylý máselesin talqylaý barysynda Іshki ister mınıstriniń orynbasary Amantaı Kúreńbekov málim etti.
Mınıstr orynbasarynyń aıtýynsha, búgingi tańda elimizdiń Qylmystyq-atqarý júıesinde qurt aýrýyna shaldyqqandar sany 831 adamdy quraǵan. «Bulardyń barlyǵy basqa sottalýshylardan tolyq oqshaýlandyrylǵan. Aýmaqtyq densaýlyq saqtaý uıymdarynyń járdemi arqasynda biz olarǵa kómekti der kezinde kórsetip kelemiz. Qazirgi tańda ondaı azamattardyń medıtsınalyq preparattarmen, dári-dármekpen qamtylý kórsetkishi 90 paıyzdy qurap otyr», - dedi A. Kúreńbekov.
