Týberkýlezge shaldyqqan naýqastarǵa dástúrli, ári ınnovtsııalyq jolmen keshendi kómek kórsetiledi
ASTANA. 3 naýryz. QazAqparat /Aınur Kenebaeva/ - Medıtsınalyq kómektiń sapasyn arttyrý maqsatynda týberkýlezge qarsy dıspanserde týberkýlezdi keshendi túrde emdeý ádisi qoldanylady.
Týberkýlezge qarsy dári-dármekpen emdeý isimen qatar, patogenetıkalyq emdeý ádisi de qoldanylady.
Bul týraly búgin Astanada ótken týberkýlezdiń aldyn alý men emdeý máselelerin arqaý etken baspasóz máslıhatynda Týberkýlezge qarsy dıspanserdiń bas dárigeri Roza Júsipova málimdedi.
R. Júsipovanyń aıtýynsha, dástúrli emdeý ádisimen birge, naýqastardyń bir bóligine hırýrgııalyq em jasalǵan. 2010 jyldyń qorytyndysyna sáıkes hırýrgııalyq jolmen emdeý kórsetkishi 62,8 % quraǵan. Bul 2009 jyl kórsetkishimen salystyrǵanda 8,5 paıyzǵa kóp.
Qazirgi tańda dıspanserde operatsııalardy torakoskopııa syndy jańa tehnologııa kómegimen jasaý múmkindigi jolǵa qoıyldy.
Týberkýlez dertiniń keńinen etek alýy emdeýdiń jańa joldaryn izdestirýdi talap etedi. 2010 jyly dıspanser jańa ınnovatsııalyq lazerlik tehnologııany engizdi. Atap aıtqanda, qandy sáýlelendirý men týberkýlezdiń turaqty ári asqynǵan formalaryn patogenetıkalyq jolmen emdeý ádisi qolǵa alyndy. Týberkýlezdi bastapqy kezeńde anyqtaý múmkindigin beretin malekýlıarly-genetıkalyq dıagnostıka júrgizý isi jetildirildi.
Aıta ketelik, 2010 jyly týberkýlezge shaldyqqan naýqastarǵa olardyń ádeýmettik dárejesin esepke ala otyryp, kólikte tegin júrý qujatynyń 1510 danasy men 18 mln. 148 myń teńge kólemindegi azyq-túlik jıyntyǵy áleýmettik kómek retinde berilgen.
«Astana qalasy máslıhatynyń sheshimine sáıkes 2011 jyldan bastap týberkýlezdiń belsendi túrine shaldyqqan Astana qalasynda tirkelgen naýqastardyń barlyǵyna áleýmettik kómek kórsetilmek», - dedi Roza Júsipova.
