Týberkýlezge shaldyqqan qańǵybastar áleýmettik ortalyqtarǵa nelikten jatqyzylmaıdy

ASTANA. QazAqparat – Týberkýlezge shaldyqqan qańǵybastardy áleýmettik qyzmet kórsetý uıymdaryna ornalastyrý múmkin emes. Bul jaıynda Májilis depýtattarynyń saýalyna Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenova jaýabynda aıtylǵan, dep habarlaıdy QazAqparat tilshisi.

«Týberkýlez kezinde halyqqa medıtsınalyq kómek kórsetýdi uıymdastyrý standartyna sáıkes, jeke basyn kýálandyratyn qujattary joq, sondaı-aq qolaısyz áleýmettik jáne turǵyn úı jaǵdaılarynda turatyn týberkýlezben aýyratyn naýqastar tegin medıtsınalyq kómektiń kepildik berilgen kólemi aıasynda tolyq saýyqqanǵa deıin ftızıopýlmonologııa ortalyqtarynda statsıonarlyq jaǵdaılarda emdelýge jatady. Sonymen qatar úkimettik emes uıymdardy tarta otyryp, olardyń qujattaryn qalpyna keltirý jumystary júrgizilýde», - dedi mınıstr jaýabynda.

Onyń atap ótýinshe, protsestiń belsendi satysynda týberkýlezben aýyratyn naýqastar arnaýly áleýmettik qyzmetter kórsetetin ýaqytsha bolý uıymdaryna turýǵa jiberilmeıdi. Sebebi bul medıtsınalyq qarsy kórsetilim bolyp sanalady.

«Osyǵan baılanysty týberkýlezben aýyratyn, belgili bir turǵylyqty jeri joq adamdardy atalǵan uıymdarǵa ornalastyrý múmkin emes. Belgili bir turǵylyqty jeri joq adamnyń ýaqytsha bolý uıymdaryna emdeý kýrsy aıaqtalǵannan jáne týberkýlezden aıyqqannan keıin jiberilýi múmkin», - dedi Tamara Dúısenova.