Týberkýlezge qarsy jańa preparattar tegin beriledi
QR Densaýlyq saqtaý mınıstri Eljan Birtanovtyń aıtýynsha, kelesi jylǵa arnalǵan tegin dári-dármekterdiń tizimi kóp ózgergen joq. Biraq oǵan týberkýlezge qarsy ınnovatsııalyq preparattar endi.
«Ol em-domnyń tıimdiligi 90 protsent deıdi. Ásirese, antıbıotıkke beıim týberkýlezge qarsy áseri qatty. Biz atalǵan preparattardy kópten beri ala almaı júrgenbiz. Buǵan deıin týberkýlezdiń aýyr formasy bar naýqastarǵa xalyqaralyq uıymdar kómektesip keldi. Sonyń ózinde tek árbir besinshi naýqasqa ǵana ondaı dári berildi. Qazaqstanda ondaı em-dom áli tirkelmegen. Alaıda biz ony tikeleı Dúnıejúzi densaýlyq saqtaý uıymynyń arqyly satyp alatyn bolamyz. Osylaısha, kelesi jyly biz aýyr naýqastardyń barlyǵyn jańa preparatpen qamtamasyz ete alamyz», - dedi E.Birtanov xalyq aldynda esep berý kezdesýi kezinde.
Mınıstrdiń aıtýynsha, kelesi aıda bıýdjettiń esebinen tegin dári-dármekterdi satyp alý naýqany bastalady. Kúzde barlyq kelisimsharttar rásimdeledi degen jospar bar. Al jeltoqsan aıynda dárixanalar men emxanalarǵa taratylady. Sol jerden kelesi jyly qańtar aıynda naýqastarǵa beriledi.
Aıta keteıik, búgingi kezdesý kezinde mınıstr fast-fýdty shekteýge qatysty pikir bildirdi. Budan bólek, Astanadaǵy perzentxanada analarynan aıyrylǵan eki náresteniń jaǵdaıy jaıynda aıtyp berdi. Jedel járdem máselesi de sóz boldy. Mınıstrdiń oıynsha, jasandy uryqtandyrýdy bıýdjet esebinen qarjylandyrǵan durys emes.