Týberkýlezge qarsy is-sharalar kólemi jetkiliksiz bolyp otyr - QR Densaýlyq saqtaý jáne áleýmettik damý mınıstrligi
ASTANA. QazAqparat - Búgin Astanada QR Densaýlyq saqtaý jáne áleýmettik damý birinshi vıtse-mınıstri S.Qaıyrbekovanyń tóraǵalyǵymen selektorlyq rejimde týberkýlezben syrqattanýshylyqty tómendetý jónindegi respýblıkalyq shtabtyń keńeıtilgen otyrysy bolyp ótti.
Jıynǵa múddeli memlekettik organdar men vedomstvolardyń ókilderi qatysty, dep habarlaıdy QR Densaýlyq saqtaý jáne áleýmettik damý mınıstrliginiń baspasóz qyzmetinen.
Shtab otyrysynda Týberkýlez problemalary ulttyq ortalyǵynyń dırektory T.Ábildaev, QR ІІM Qylmystyq-atqarý júıesi komıteti tóraǵasynyń orynbasary A.Bazylbekov, sondaı-aq densaýlyq saqtaý basqarmalarynyń jetekshileri baıandama jasady.
Salıdat Qaıyrbekova Qazaqstan ǵalamdyq básekege qabilettilik ındeksinde ustanymyn jaqsartqanymen, týberkýlezdiń dárige tózimdi túrimen syrqattanýshylyq kóleminiń artýy, sondaı-aq qylmystyq-atqarý júıesi mekemelerindegi týberkýlezge shaldyqqan naýqastarǵa kórsetiletin kómek jaıy mamandardy alańdatyp otyrǵanyn alǵa tartty.
Oǵan qosa, jıynǵa qatysýshylar jergilikti atqarýshy organ ókilderiniń nazaryn jyldam dıagnostıkalaý qondyrǵylarymen jabdyqtaý, naýqastardy áleýmettik qoldaý, týberkýlezge qarsy birqatar uıymdardyń materıaldyq-tehnıkalyq bazasyn ınfektsııalyq baqylaý talaptaryna sáıkestendirý sııaqty týberkýlezge qarsy is-sharalar kóleminiń jetkiliksiz bolyp otyrǵanyna aýdardy.
Respýblıkalyq shtab sheńberinde QR DSÁD birinshi vıtse-mınıstri Medıtsınalyq qyzmetti baqylaý komıtetine penıtentsıarlyq júıeniń týberkýlezge qarsy mekemelerine tekserý júrgizýdi tapsyrdy.
