Týberkýlezdiń jabyq túrimen aýyratyn naýqastar qalalyq emhanalarda em alatyn bolady
ORAL. QazAqparat - Oblystyq týberkýlezden emdeıtin dıspanserde týberkýlezdiń jabyq túrimen aýyratyn naýqastardy emdeý qyzmeti bıylǵy jyl sońynda qalalyq emhanalarǵa beriletin bolady. Bul týraly oblystyq densaýlyq saqtaý basqarmasynda ótkizilgen brıfıngte aıtyldy.
Onda QR Densaýlyq saqtaý jáne áleýmettik damý mınıstrligi týberkýlez máseleleri ulttyq ortalyǵynyń dırektory Jumaǵalı Ismaılovtyń atap ótkenindeı, bul qorshaǵan ortaǵa qaýip tóndirmeıtin, bylaısha aıtqanda, aýrýy adamdarǵa juqpaıtyn týberkýlezdiń jabyq túrimen syrqattanatyn naýqastardy osy derttiń ashyq túrine shaldyqqandardan bólip, ambýlatorııalyq emdeý maqsatynda jasalyp otyr. «El úkimeti týberkýlezdi emdeýdiń 2016-2025 jyldarǵa arnalǵan jańa úlgisin maquldady. Soǵan sáıkes týberkýlezdiń jabyq túrimen aýyratyndardy ambýlatorlyq emdeý júıesin keńeıtý qarastyrylǵan. Mundaı aýrýlar týberkýlezdiń ashyq túrimen syrqattanatyndarmen birge emdelse, olardan aýrý juqtyrýy múmkin. Sondyqtan endi olar turǵylyqty mekenjaılary boıynsha emhanalarda em qabyldaıtyn bolady», dedi J.Ismaılov.
Oblystyq densaýlyq saqtaý basqarmasynyń basshysy Qamıdolla Irmenovtiń aıtýynsha, ambýlatorııalyq em alatyndardyń jaǵdaıyn ýchaskelik dáriger men ftızıatr baqylaıtyn bolady. Al týberkýlezden emdeıtin dıspanserde onyń ashyq túrimen aýyratyn naýqastar qalady.
