Týberkýlezdiń qaýipti túrin juqtyrǵan qostanaılyq emdelýden qashyp júr
QOSTANAI. QazAqparat - Qostanaı oblystyq týberkýlezge qarsy dıspanserdiń qyzmetkeri 38 jastaǵy qala turǵynyna májbúrlep emdeý sharalaryn qoldaný týraly sotqa ótinish túsirdi, dep habarlaıdy Qostanaı oblystyq sotynyń baspasóz qyzmeti.
Dıspanser dárigerleri er adamǵa «Ókpeniń ınfıltratıvti týberkýlezi ydyraý fazasy» degen dıagnoz qoıǵan. Alaıda, ol osy jyldyń qyrkúıek aıynan bastap emdeýden bas tartqan. Ol qasynda júrgenderge qaýip tóndirýi múmkin.
«Azamat R. májbúrlep emdeýdi qajet etedi. Ol óz erkimen emdelýden qashyp, úıinde turmaı, boı tasalap júr. Atalǵan jáıtti qaraý nátıjeleri boıynsha sot Qostanaı oblystyq týberkýlezge qarsy dıspanser qyzmetkeriniń ótinishin qanaǵattandyrdy», - dep habarlaıdy oblystyq sottyń baspasóz qyzmeti.
Sot úkimimen azamat R. Rýdnyı qalalyq týberkýlezge qarsy dıspanserge májbúrli túrde emdelýge jiberildi.
Úkim zańdy kúshine engen joq.
