Týberkýlezdi 2 saǵat ishinde anyqtaýǵa múmkindik beretin tásil iri qalalar men aýdan ortalyqtarynda da engizilmek - T.Ábildaev
ASTANA. QazAqparat - Týberkýlezdi 2 saǵattyń ishinde anyqtaýǵa múmkindik beretin tásil iri qalalar men aýdan ortalyqtarynda da engiziletin bolady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Týberkýlez problemalary ulttyq ortalyǵynyń dırektory Tileýhan Ábildaev málim etti.
«Qazirgi ýaqytta týberkýlezdi anyqtaýdyń jańa ádisteriniń biri G-Xpert bolyp otyr. Bul tásilmen týberkýlezdiń juqpaly túrlerin 2 saǵattyń ishinde jáne kóptegen dárige tózimdi túrin anyqtaýǵa múmkindik alyp otyrmyz», - dedi ol.
Onyń atap ótýinshe, bul tásil 2012 jyldyń sońnan bastap Qazaqstanda engizilgen. Qazirgi ýaqytta barlyq oblys ortalyqtarynda osy tásil qoldanylyp jatyr. «Bolashaqta týberkýlezge qarsy kúrestiń keshendi is-josparlarynyń aıasynda biz muny basqa da úlken qalalarda, aýdan ortalyqtarynda engizip, halyqqa qoljetimdiligin arttyrýdy maqsat etip otyrmyz», - dedi T.Ábildaev.
