Týberkýlezben emdelýden jaltarǵandar májbúrli túrde emdeledi
ASTANA. QazAqparat - Astana qalasynyń Saryarqa aýdandyq sotynda «Týberkýlezben naýqastanǵan jáne emdelýden jaltarǵan azamattardy májbúrlep emdeý týraly aryzdardy qaraý» taqyrybynda dóńgelek ústel ótti, dep habarlaıdy qalalyq sottyń baspasóz qyzmeti.
Sharada Saryarqa aýdandyq sotynyń tóraǵasy Arman Júkenov densaýlyq saqtaý týraly zańnyń týberkýlezben aýyratyn naýqastarǵa medıtsınalyq kómek kórsetý baptaryn túsindirip berdi.
«Zańda týberkýlezben aýyratyn naýqastar mindetti túrde medıtsınalyq baıqaýda bolýǵa jáne emdelýge jatatyny, tegin medıtsınalyq kómektiń kepildik berilgen kólemi sheńberinde qajetti dárilik zattarmen qamtamasyz etiletini kózdelgen. Týberkýlezdiń juqpaly túrimen aýyratyn naýqastar mindetti túrde aýrýhanaǵa jatqyzylyp, emdelýge jáne ońaltylýǵa tıis», delingen habarlamada.
«Týberkýlezdiń juqpaly túrimen aýyratyn jáne emdelýden jaltaratyn azamattardy májbúrlep emdeý týraly sheshimdi densaýlyq saqtaý organdarynyń (uıymdarynyń) usynysy boıynsha sot qabyldaıdy»,- dedi sot tóraǵasy Arman Júkenov.
Týberkýlezdiń juqpaly túrimen aýyratyn, májbúrlep emdeýge jiberilgen naýqastyń jumys orny saqtalady. Májbúrlep emdeýde bolý ýaqytynda eńbek stajy úzilmeıdi jáne ol jalpy eńbek stajyna esepteledi.
Sharada «Týberkýlezge qarsy dıspanser» dárigeri Armangúl Baıshalova: «búginde týberkýlezben naýqastaný kórsetkishteri tómendep keledi. Ólim kórsetkishteri 16,1 paıyzǵa deıin qysqardy» degen pikirin bildirdi.
