Týberkýlezben aýyratyndardy áleýmettik qoldaýǵa qansha qarjy jumsalady
ASTANA. QazAqparat - Qazaqstanda jyl saıyn týberkýlezben aýyratyndardy áleýmettik qoldaýǵa 1 mlrd teńgeden astam qarajat bólinedi. Bul týraly Ulttyq ftızıopýlmonologııa ǵylymı ortalyǵynyń dırektory Málik Ádenov aıtty, dep habarlaıdy QazAqparat tilshisi.
«Búginde Qazaqstanda týberkýlezben aýyratyn patsıentterdi áleýmettik qoldaýǵa jyl saıyn 1 mlrd 200 mln teńgeden astam qarajat bólinedi. Bul 2017 jyldyń ishinde bólingen soma», - dedi ol Dúnıejúzilik densaýlyq saqtaý uıymynyń alǵashqy medıtsınalyq-sanıtarlyq kómek jónindegi jahandyq konferentsııasy aıasynda BAQ ókilderine bergen suhbatynda.
Onyń dereginshe, atalǵan qarajat týberkýlezben aýyratyn patsıentterdiń 50-56 paıyzyn áleýmettik qoldaýǵa múmkindik beredi.
«Bul Úkimet pen ákimdikterdiń týberkýlezben kúreske qosqan úlesi. Árbir óńirde bul kómek ártúrli kórsetiledi. Máselen, bir óńirler tegin jol júrý qujattaryn berse, endi bir óńirde aı saıyn aqshalaı járdemaqy tólenedi, al endi birinde tegin túski as uıymdastyrlady», - dedi Málik Ádenov.
Buǵan deıin ol sońǵy 10 jylda Qazaqstanda týberkýlezden qaza tabatyndardyń sany 5,6 esege azaıǵanyn, mindetti áleýmettik medıtsınalyq saqtandyrý engizilgennen keıin de týberkýlezden emdeý tegin bolyp qala beretindigin aıtqan edi.
Aıta keteıik, keshe elordada Dúnıejúzilik densaýlyq saqtaý uıymynyń alǵashqy medıtsınalyq-sanıtarlyq kómek jónindegi jahandyq konferentsııasy bastaldy. Halyqaralyq jıyn qatysýshylaryna Elbasy N.Nazarbaev vıdeojoldaý joldady.
