Týberkýlez juqtyrǵan astanalyqtardyń 53,9% eńbekke qabiletti jasta
Bul týraly Astana qalasy sanıtarlyq-epıdemııalogııalyq baqylaý departamenti basshysynyń orynbasary Janna Pralıeva málim etti, dep habarlaıdy QazAqparat tilshisi.
«Ótken jyly elordada tynys alý joldarynyń týberkýlezin juqtyrǵan 401 naýqas anyqtaldy. Bul týberkýlez juqtyrǵandardyń jalpy sanynyń 88,7%. Onyń ishinde bakterııa bóletini 151 jaǵdaı nemese 37,7%. Naýqastardyń 78,7%-y 18-den 64 jas aralyǵyndaǵy adamdar. Sonymen qatar týberkýlez juqtyrǵandardyń 53,9%-y eńbekke qabiletti jasta (18-44 jas). Týberkýlez ınfektsııasy anyqtalǵandardyń 54,8% nemese 248 patsıent medıtsınalyq kómekke óz betinshe júgindi. Al 45,2% nemese 204 adamnan atalǵan dert medıtsınalyq tekserý kezinde anyqtaldy», – dedi Janna Pralıeva Astana qalasy kommýnıkatsııalar qyzmeti alańynda ótken baspasóz máslıhatynda.
Onyń aıtýynsha, aldyn ala medıtsınalyq tekserý týberkýlezdi ýaqtyly anyqtaýǵa septigin tıgizedi.
«Flıýorografııa týberkýlez ınfektsııasyn alǵashqy satyda anyqtap, der kezinde emdi bastaýǵa múmkindik beredi. Qazir elordada flıýorografııalyq profılaktıkadan ótý úshin vedomstvolyq uıymdarǵa baǵynysty 19 statsıonarlyq jáne 12 jyljymaly flıýorografııalyq qondyrǵy bar», - deıdi ol.
Janna Pralıeva keltirgen málimetke sáıkes, sońǵy 5 jyl ishinde Astana qalasynda týberkýlezben syrqattaný 29,3%-ǵa, al ólim-jitim 39,3%-ǵa tómendegen.
Aıta ketsek, búgin týberkýlezge qarsy dúnıejúzilik kúres kúni.