Týberkýlez dıagnostıkasy: Koh taıaqshalaryn 2 saǵattyń ishinde anyqtaýǵa bolady

ASTANA. KAZINFORM — Endi elimizde týberkýlez dertin eki saǵattyń ishinde dıagnostıkalaý múmkindigi bar.

Tolyǵyraq Densaýlyq saqtaý mınıstrliginiń ulttyq ftızıopýlmonologııa ǵylymı ortalyǵynyń dırektory, Densaýlyq saqtaý mınıstrliginiń shtattan tys bas ftızıatr-dárigeri Málik Ádenov aıtyp berdi.

— Elimizde medıtsınalyq-sanıtarııalyq alǵashqy kómek uıymdary deńgeıinde týberkýlezdi dıagnostıkalaýdyń zamanaýı jyldam molekýlalyq-genetıkalyq ádisteri engizildi. Bul týberkýlez mıkobakterııalarynyń týberkýlezge qarsy preparattarǵa dárilik sezimtaldyǵyn 2 saǵattyń ishinde anyqtaýǵa múmkindik beredi. Bul emdi bastamas buryn ýaqytty edáýir qysqartýǵa jáne aýrýdyń taralý qaýpin azaıtýǵa múmkindik beredi, — dedi Málik Ádenov ortalyq kommýnıkatsııalar qyzmeti alańynda ótken baspasóz máslıhatynda.

Densaýlyq saqtaý mınıstrliginiń málimetinshe, týberkýlez dertin dıagnostıkalaýdyń zerthanalyq ádisteri halyqaralyq standarttarǵa sáıkes keledi jáne barlyq óńirdegi ortalyqtarda bar. 

Ulttyq ftızıopýlmonologııa ǵylymı ortalyǵynyń aqparatyna súıensek, bıyl 6 aıda medıtsınalyq-sanıtarııalyq alǵashqy kómek uıymdarynda týberkýlezge kúdikti 44 941 adam XpertMTB/Rif ádisimen zertteýden ótti. Onyń ishinde 4 230 adamnan oń jaǵdaı anyqtaldy (9,4%). 

— Týberkýlez ınfektsııasy anyqtalǵan 8633 patsıent profılaktıkalyq em aldy. Sol sııaqty 600 myńnan astam qazaqstandyq flıýorografııalyq zertteý-qaraýdan ótti, — deıdi mınıstrlik ókili.

Buǵan deıin habarlaǵanymyzdaı bıyl alty aıda elimizde týberkýlez dertinen ólim-jitim 20 paıyzǵa tómendedi.

Al bıyl naýryzdaǵy esep boıynsha elimizde týberkýlezden ólim-jitim 50 paıyzǵa azaıǵan. 

Aıta keteıik, AQSh ǵalymdary týberkýlezge qarsy kúreste úlken jetistikke jetti.