Týberkýlez dertine shaldyǵý Qazaqstanda joǵary deńgeıde saqtalyp otyr -Týberkýlez máseleleri Ulttyq ortalyǵynyń dırektory
ALMATY. 29 aqpan. QazAqparat -2002 jyldan bastap qurt aýrýymen naýqastaný sany 100 myń adamǵa shaqqanda 165,1 kórsetkishinen 2011 jyly 100 myń adamǵa shaqqanda 86,8-ge deıin tómendedi.
ıAǵnı týberkýlez aýrýy kórsetkishi 47 paıyzǵa kemip otyr. Degenmen de, qazirgi tańda bul dertke shaldyǵý Qazaqstanda joǵary deńgeıde saqtalýda. Sol sebepti de qurt aýrýynyń aldyn alý jáne emdeý Qazaqstan Respýblıkasynyń 2011-2015 jyldarǵa arnalǵan «Salamatty Qazaqstan» densaýlyq saqtaý salasyn damytý boıynsha memlekettik baǵdarlamasynyń basym baǵyttarynyń biri bolyp tabylady. Bul týraly Almatyda «Qazaqstandaǵy qurt aýrýyna baılanysty jaǵdaıdy ózgertýge ne kómektese alady: sarapshylardyń pikiri» degen taqyrypta ótken baspasóz máslıhatynda QR Densaýlyq saqtaý mınıstrliginiń Týberkýlez máseleleri Ulttyq ortalyǵynyń dırektory Tileýhan Ábildaev aıtty.
Onyń sózine qaraǵanda, qurt aýrýy qazirgi zamandaǵy qoǵamdyq densaýlyq saqtaý salasynyń álemdik aýqymdaǵy kúrdeli máselesi retinde qalyp otyr.
«Aldyn alý sharalaryn elemeýdiń qazirgi jaǵdaıynda qurt aýrýy kedeı bolsyn, baı bolsyn, halyqtyń barlyq toptaryna jetip otyr. Kóptegen dárilerge turaqtylyq kórsetetin jáne emdelýi qıyn qurt aýrýyna shaldyǵýdyń óskeni baıqalýda. bul keseldiń aýyrtpalyǵy densaýlyq saqtaý júıesine túsetin orasan zor salmaq túsirip, el ekonomıkasyndaǵy shyǵynmen tyǵyz baılanysyp qana qoımaı, sondaı-aq halyq sanynyń kemýine ákelip soǵýda. DDSU boljamy boıynsha aldaǵy 10 jylda qurt aýrýy búkil álem boıynsha aýrý-syrqat pen ólim-jitimge ákeletin 10 negizgi sebepterdiń biri retinde qala bermek»,-deıdi Salaýatty ómir saltyn qalyptastyrý máseleleri Ulttyq ortalyǵynyń dırektory Jamılıa Battaqova.
Dúnıejúzilik densaýlyq saqtaý uıymynyń málimetterine sáıkes 2010 jyly qurt aýrýynyń 8,8 mln. jańa jaǵdaıy tirkelgen (2009 jyly bul kórsetkish 9,4 mln. quraǵan). Naýqastardy emdeýdiń qoljetimdi ári tıimdi joldary bar bolǵanymen, 2010 jyly 1,1 mln. adam týberkýlez aýrýynan qaıtys bolǵan.
