Týberkýlez derti kóp jaǵdaıda áleýmettik máselege baılanysty týyndaıtyn aýrý - R. Júsipova
ASTANA. 3 naýryz. QazAqparat /Aınur Kenebaeva/ - Týberkýlez derti kóp jaǵdaıda áleýmettik máselege baılanysty týyndaıtyn aýrý qataryna jatady, sondyqtan atalmysh kesel halyqtyń áleýmettik qorǵalmaǵan toptary arasynda jıi týyndaıdy.
Búgin Astanada týberkýlezdiń aldyn-alý men emdeý máselesine arnalǵan baspasóz konferentsııasynda bul týraly Týberkýlezge qarsy dıspanserdiń bas dárigeri Roza Júsipova aıtty.
«Zeınetkerler, múmkindigi shekteýli tulǵalar, stýdentter, turaqty turǵyn mekeni joq adamdar, jumyssyzdar syndy qoǵamnyń áleýmettik qorǵalmaǵan toptary boıynsha tirkelgen kórsetkish 66,2 paıyzdy quraıdy. Týberkýlezge shaldyqqan jumyssyz adamdardyń úlesi - 44,9 paıyz, stýdentter úlesi - 7,2 paıyz», - dep málimdedi R. Júsipova.
Kóshi-qon máselesi de Astana qalasy boıynsha anyqtalǵan týberkýlezdiń taralý kórsetkishine óz áserin tıgizbeı qoımaıdy. Bul - Astana qalasy boıynsha jınaqtalǵan statıstıkalyq kórsetkishke áser etetin negizgi faktor. Astana qalasyna oqý men jumys isteý maqsatynda kelgen týberkýlezge shaldyqqan adamdardyń sany jalpy aýrýlar sanynyń 31,4 paıyzdy quraǵan. Osy kórsetkish boıynsha Aqmola oblysyna qarasty aýdandardan kelgen turǵyndar 61,7 paıyz kórsetkishpen birinshi orynda tur. Al ekinshi orynda - OQO turǵyndary jáne olardyń úles salmaǵy 9,1 paıyzdy qurap otyr.
Sharada Astana qalasy boıynsha tirkelgen statıstıkalyq málimetterge áser etetin faktorlar talqyǵa salynyp, týberkýlezdiń taralý yqtımaldyǵy basym toptardyń máselesi sóz boldy.
